काठमाडौँ । आज र भोलि देशका विभिन्न स्थानमा ठूलो पानी पर्ने पूर्वानुमानलाई मध्यनजर गरी यसको पूर्वतयारीका सन्दर्भमा सम्भावित प्रभावित जिल्लाका प्रमुख जिल्ला अधिकारी तथा जिल्ला विपद् व्यवस्थापन समितिका सदस्यहरूसँग प्राधिकरणले आज छलफल गरेको छ ।
आज भर्चुअल रुपमा भएको बैठकमा पूर्वतयारीका लागि गर्नुपर्ने कार्यहरूका बारेमा प्रमुख जिल्ला अधिकारीहरुले आ–आफ्नो जिल्लाले गरिरहेको तयारी, साधनस्रोत र अवस्थाका बारेमा जानकारी गराएको प्राधिकरणको प्रतिकार्य शाखा प्रमुख रामबहादुर केसीले सीआईएनसँग बताउनुभयो ।
प्राधिकरणका कार्यकारी प्रमुख प्रदीप कुमार कोइरालाले उच्च सतर्कता अपनाउन भनिएका जिल्लाहरुमा विशेष तयारी अवस्थामा रहन र थप सहयोग आवश्यक पर्नासाथ सम्पर्क गर्न अनुरोध गर्नु भएको थियो ।
कोशी, गण्डकी, लुम्बिनी र सुदूरपश्चिम प्रदेशका पहाडी तथा तराईका केही स्थानमा मुसलधारे पानीपर्ने पूर्वानुमान गरिएकाले उच्च सतर्कता अपनाउन प्राधिकरणले अनुरोध गरेको छ ।
जल तथा मौसम विज्ञान विभागका प्रवक्ता, वरिष्ठ मौसमविद् विभुती पोखरेलका अनुसार पाँचथर, इलाम, झापा, सङ्खुवासभा, तेह्रथुम, भोजपुर, खोटाङ, धनकुटा, सिन्धुली, ललितपुर, काभ्रे, सिन्धुपाल्चोक, नुवाकोट, चितवन, धादिङ, गोरखा, लमजुङ, कास्की, तनहुँ, पर्वत, बागलुङ, म्याग्दी र स्याङ्जामा उच्च सावधानी अपनाउनुपर्ने छ ।
प्रकाशित मिति: शनिबार, साउन २, २०८३
