काठमाडौँ । पछिल्लो ३ घण्टाको समयको तुलना गर्दा सबैभन्दा धेरै पानी कोशी प्रदेशमा परेको छ ।
कोशी प्रदेशको खोटाङ जिल्लामा सबैभन्दा धेरै पानी परेको छ । लामिडाँडा क्षेत्रमा पछिल्लो ३ घण्टामा १२ दशम्लव २ मिलिमिटर पानी पर्दा उदयपुरको गढी क्षेत्रमा ३ घण्टामा १० दशम्लव ६ मिलिमिटर पानी परेको छ ।
कुर्लेघाट क्षेत्रमा ९ दशम्लव ४ मिलिमिटर पानी परेको मौसम पूर्वानुमान महाशाखाको भनाइ छ ।
महाशाखाका अनुसार आज दिउँसो देशभर साधारणतया बादल लाग्नेछ । कोशी, बागमती र गण्डकी प्रदेश लगायत देशका हिमाली र पहाडी भू-भागका केही स्थानहरू तथा मधेश र लुम्बिनी प्रदेशको तराई भू-भागका थोरै स्थानहरू साथै सुदूरपश्चिम प्रदेशको तराई भू-भागका एक-दुई स्थानमा मेघगर्जन/चट्याङ्गसहित मध्यम खालको पानी र हिउँ पर्ने सम्भावना रहेको छ ।
गण्डकी प्रदेशको एक-दुई स्थानमा भने ठूलो पानी पर्ने सम्भाना छ । आज राति देशभर साधारणतया बादल लाग्ने पूर्वानुमान गरिएको छ ।
कोशी, मधेश र बागमती प्रदेश लगायत सुदूरपश्चिम, लुम्बिनी र गण्डकी प्रदेशका पहाडी र तराई भू-भाग तथा कर्णाली प्रदेशका पहाडी भू-भागका केही स्थानहरूमा साथै गण्डकी, लुम्बिनी, कर्णाली र सुदूरपश्चिम प्रदेशका हिमाली भू-भागका थोरै स्थानहरूमा मेघगर्जन/चट्याङ्सहित मध्यम पानी र हिउँ पर्ने सम्भावना छ ।
कोशी, मधेश, बागमती र लुम्बिनी प्रदेशको एक-दुई स्थानमा भने ठूलो पानी पर्ने सम्भावना रहेको महाशाखाले जनाएको छ ।
प्रकाशित मिति: बिहीबार, जेठ २८, २०८३
