बाँके। बाँके डुडुवा गाउँपालिकालाई पूर्ण खोप सुनिश्चितता तथा दिगोपना घोषणा गरिएको छ।
डुडुवा गाउँपालिकाका अध्यक्ष नरेन्द्रकुमार चौधरीको अध्यक्षतामा आइतबार गाउँपालिकाको सभाहलमा भएको विशेष कार्यक्रममा जिल्ला समन्वय समितिका प्रमुख ज्ञानेन्द्र कुमार चौधरीले पालिकालाई पूर्ण खोप सुनिश्चितता तथा दिगोपना घोषणा गर्नुभयो ।
कार्यक्रममा बोल्दै प्रमुख चौधरीले समुदायमा अझै पनि खोपप्रतिको चेतनाको कमी रहेको भन्दै जनप्रतिनिधि, स्वास्थ्यकर्मी तथा महिला स्वास्थ्य स्वयंसेविकाहरू सबैको पहल आवश्यक रहेको बताउनुभयो । उहाँले समुदायमा खोपसम्बन्धी सेवाबाट कुनै पनि बालबालिका वञ्चित हुन नदिन पालिका प्रतिबद्ध रहनुपर्नेमा जोड दिनुभयो ।
गाउँपालिकाका अध्यक्ष नरेन्द्र कुमार चौधरीले स्वास्थ्य क्षेत्रलाई पालिकाले पहिलो प्राथमिकतामा राखेर काम गर्दै आएको भन्दै भोलीका देशका भविष्य बोकेका बालबालिकाहरुलाई स्वस्थ राख्न खोप अनिवार्य आवश्यक रहेकोमा जोड दिनुभयो। अध्यक्ष चौधरीले स्वास्थ्य अति सबेंदनशिल क्षेत्र भएकाले सबैको स्वास्थ्य सेवा हरेक नागरिकलाई प्रवाह गर्दै आएको भन्दै पालिकाले केही समुहलाई निःशुल्क तथा सहुलियतमा सेवा प्रदान गरिरहेको जानकारी गराउनुभयो।
पालिकाभित्र रहेका १५ वर्ष मुनिका एक हजार ५२ जना र १६ देखि २३ महिनाभित्रका ८ सय ३१ जना बालबालिकाले राष्ट्रिय खोप तालिका अनुसार सबै आवश्यक खोप प्राप्त गरेपछि पालिकालाई पूर्ण खोप सुनिश्चितता तथा दिगोपना पालिका घोषणा गरिएको स्वास्थ्य शाखा प्रमुख सिताराम चौधरीले बताउनुभयो ।
त्यस अवसरमा अनिवार्य सेवा निवृत्त ५ जना कर्मचारीलाई सम्मान गरिएको थियो। सिनियर अनमी संगिता वर्मा, पवन कुमारी बाहुनी, सुमनलता सिंह, खड्गनाथ सापकोटा र महिला स्वास्थ्य स्वमसेविका प्रेम कुमारी अधिकारीलाई दोसल्ला र मायाको चिनो प्रदान गरी सम्मान गरिएको शाखा प्रमुख चौधरीले जानकारी दिनुभयो । त्यसैगरी स्वास्थ्य केन्द्रका प्रमुख तथा पालिकाका सबै महिला स्वास्थ्य स्वमसेविकाहरुलाई पनि सम्मानित गरिएको थियो ।
घोषणा कार्यक्रममा जिल्ला समन्वय समितिका उपप्रमुख सीता कार्की, डुडुवा गाउँपालिका वडा नं। ३ का अध्यक्ष आमोद तिवारी, प्रमुख प्रशासकीय अधिकृत अशोक कुमार पाण्डे, वडा सदस्य सुष्मा यादव, स्वास्थ्य कार्यालय बाँकेका जनस्वास्थ्य अधिकृत देवनारायण उपाध्याय, नेपाल पत्रकार महासंघका अध्यक्ष नवीन गिरी लगायतको सहभागिता रहेको थियो । कार्यक्रममा पुर्ण खोपको सुनिश्चिता बारे सामुहिक प्रतिबद्धतामा हस्ताक्षर गरिएको थियो ।
प्रकाशित मिति: आइतबार, जेठ ३, २०८३
