पूर्ण सार्की/डोल्पा।
हिमाली जिल्ला डोल्पामा यार्सागुम्बा संकलनका लागि यार्सापाटनहरु आगामी जेठ १० गतेदेखि खुला गरिने भएको छ ।
जिल्लाको सदरमुकाम दुनैमा मंगलबार बसेको सर्वपक्षीय सर्वदलीय बैठकले आगामी जेठ १० गतेदेखि जिल्लाका सबै पाटनहरू खुला गर्ने निर्णय गरेको शे-फोक्सुण्डो राष्ट्रिय निकुञ्जका निमित्त कार्यालय प्रमुख विज्ञान सेनले जानकारी दिनुभएकाे छ ।
‘गत वर्षभन्दा यो पटक अलि ढिलो पाटनहरू खुल्ला गर्ने निर्णय भएको छ’, प्रमुख सेनले भन्नुभयाे, ‘ आज बसेको बैठकमा एक महिनाका लागि पाटन खुल्ला गर्ने सर्वपक्षीय सहमति भएको छ ।’
उहाँका अनुसार यार्सागुम्बा संकलनका लागि शे-फोक्सुन्डो राष्ट्रिय निकुञ्ज क्षेत्र र डिभिजन वनको क्षेत्रमा पर्ने सम्पूर्ण पाटन आम सर्वसाधारणका लागि खुल्ला गरिने छ ।
यार्सा टिप्न पाटन जानेहरूका लागि तीन प्रकारका प्रवेश अनुमति पत्रको व्यवस्था गरिएको छ। जसअनुसार निकुञ्ज भित्रका मध्यवर्ती क्षेत्रभित्रका बासिन्दालाई पाँच सय 'क वर्ग' , डोल्पा जिल्लाभित्रका नागरिकलाई दुई हजार 'ख' वर्ग र जिल्ला बाहिरकालाई तीन हजार 'ग' वर्ग शुल्क निकुञ्जले निर्धारण गरेको छ।
मध्यवर्ती क्षेत्र र जिल्ला भित्रका बासिन्दालाई प्रवेश शुल्कको लागि अनिवार्य परिचय पत्र देखाउनु पर्ने छ। यदि न देखाएमा 'ग' वर्ग कै प्रवेश शुल्क काटिने छ । यार्सागुम्बा संकलनको लागि जेठ ५,६,७ गते सम्बन्धित पाटनका क्षेत्रमा प्रवेशका लागि तिरी सक्नु पर्ने छ ।
यार्सापाटनमा १६ वर्ष भन्दा तलका बालबालिकालाई प्रवेशमा निषेध गरिने समेत निकुञ्जले जानकारी दिएको छ ।
आज बसेको बैठकले पाटनमा सामुदायिक वन उपभोक्ता समितिबाट माग भएमा सुरक्षाका लागि नेपाली सेना, सशस्त्र प्रहरी बल, राष्ट्रिय अनुसन्धान र नेपाल प्रहरी परिचालन गर्ने समेत निर्णय गरिएको प्रमुख सेनले बताउनुभयाे।
पाटन क्षेत्रको गस्तीका लागि निकुञ्ज कर्मचारी र सेना परिचालन भइसकेकाले तोकिएको मितिअगावै पाटन क्षेत्र पुग्नेलाई कारबाही गरिने बताइएको छ । प्रत्येक वर्ष डोल्पाका उच्च हिमाली क्षेत्रमा रहेका पाटनमा हजारौं सर्वसाधारण यार्सा संकलनका लागि पुग्ने गर्छन् ।
डोल्पाका सयौं यार्सापाटनहरुमा बहुमूल्य जडीबुटी यार्सागुम्बा पाइने गरेको छ । यार्सा संकलनका लागि डोल्पा, जाजरकोट, रुकुम पश्चिम लगायतका क्षेत्रहरूबाट अधिकांश घर नै खाली गरेर हिमाली जिल्ला डोल्पाका उच्च पटनहरुमा ज्यानै जोखिम मोलेर जाने गरेका छन् ।
यार्सागुम्बा संकलनको समयमा यार्सापाटन पुगेका नागरिकले अन्य जडीबुटी संकलन गरेको र वन्यजन्तु सिकार गरे सोही अनुसार कारवाही गरिने निकुञ्जले जानकारी दिएको छ ।
प्रकाशित मिति: बिहीबार, वैशाख २४, २०८३
