काठमाडौँ । वैशाख २१ गते काभ्रे जिल्लाको रोशी गाउँपालिका ७ घुमाउने स्थित रोशी खोलामा पानीको सतह बढेर अफ्ठेरोमा परेका ८९ जनाको उद्धार भएको छ ।
पानीको सतह बढेर सडक कटान गरी बाटो पूर्ण रुपमा अवरुद्ध भएका कारण फसेकाहरूको सशस्त्र प्रहरी, नेपाली सेना र नेपाल प्रहरिको संयुक्त सुरक्षाफौजले गएराति सकुशल उद्धार गरेको हो ।
५ वटा इभी हाईस खोलामा फसेको जानकारी पाउनासाथ सशस्त्र प्रहरी बल नेपाल नम्बर १५ गण काभ्रे र मनसुन प्रतिकार्य बेश भकुण्डेबाट सशस्त्र प्रहरीको टोली उद्धार कार्यको लागि खटिएको थियो ।
उक्त टोलीले डोरीको सहायताबाट उद्धार गर्न सम्भव नभएपछि नम्बर १६ गण सिन्धुपाल्चोक र अस्थायी मनसुन प्रतिकार्य बेश पनौतीबाट विपद् व्यवस्थापन तालिम प्राप्त थप टोलीले र्याफ्ट बोर्डको सहायताले रिभर क्रसिङ विधिद्धारा ६ जना बालबालिकासहित ३५ जना महिला र ४८ जना पुरुष गरी ८९ जनाको उद्धार गरेको हो ।
सशस्त्र प्रहरी बलका सहप्रवक्ता डीएसपी शैलेन्द्र थापाका अनुसार काभ्रे जिल्लाको धुलिखेल नगरपालिका–५ स्थित बनेपा खड्पु भित्रि सडक खण्डमा लिन इन्टरनेश्नल इङ्ग्लिस बोर्डिङ स्कूलको बस फसेको र अस्थायी मनसुन प्रतिकार्य बेश पनौतीबाट सशस्त्र प्रहरीको टोली खटिएर ३० जना विद्यार्थी र ५ जना शिक्षक सहित ३५ जनाको पनि सकुशल उद्धार गरेको छ ।
प्रकाशित मिति: मंगलबार, वैशाख २२, २०८३
