काठमाडौँ । जल तथा मौसम विज्ञान विभागका अनुसार आज ४ प्रदेशका विभिन्न जिल्लामा तीव्र गतिको हावाहुरी चल्ने सम्भावना छ ।
कोशी प्रदेशको मोरङसहित आसपासका जिल्ला, मधेश प्रदेशका धनुषा र बारासहित आसपासका जिल्ला, लुम्बिनी प्रदेशका बर्दिया, बाँके, दाङ र अर्घाखाँचीसहित आसपासका जिल्ला र सुदूरपश्चिम प्रदेशका डडेलधुरा र डोटीसहित आसपासका जिल्लामा तीव्र गतिको हावाहुरी चल्ने सम्भावना रहेकाले सावधानी अपनाउन विभागले भनेको छ ।
विभागका अनुसार यी स्थानमा आज बुधवार साँझ ५:४५ बजे हुरी सुरु भइ भोलि विहीवार बिहान ७:४५ बजेसम्म रहने अनुमान गरिएको छ।
मेघगर्जन / चट्याङ्ग / हावाहुरी / असिनासहित पानी पर्ने प्रणाली पश्चिमदेखि क्रमशः पूर्वतिर सर्दै जाने सम्भावना रहेकाले सम्भावित जोखिमबाट बच्ने गरी तयारी गर्न विभागको मौसम पूर्वानुमान महाशाखाका मौसमविद् हरिप्रसाद दाहलले सीआईएनमार्फत सबैसँग अनुरोध गर्नुभयो ।
तीव्र हावाहुरीका कारण रुख ढल्ने, कमजोर संरचना ढल्ने, छाना उड्ने, विद्युत तथा सञ्चार सेवा प्रभावित हुने लगायतका जोखिम रहने भएकाले सबैले सावधानी अपनाउनुपर्ने महाशाखाको भनाइ छ ।
हावाहुरी चलेको बेला देहायका कुरामा ध्यान दिनुहुनुपर्छः
- सकेसम्म घरबाहिर हिँडडुल नगर्ने ।
- घरको झ्यालढोका राम्रोसँग बन्द गर्ने ।
- जस्तालगायतबाट बनेको छानो कमजोर छ भने बन्धन बलियो बनाउने ।
- घरबाहिर आगो नबाल्ने, घरभित्र पनि आगो बाल्दा सावधानी अपनाउने ।
- लड्न सक्ने कमजोर संरचना, अग्ला रुख, खम्बा नजिक र बिजुलीको तारमुनि नबस्ने ।
- बिजुलीको तार लत्रिएको छ भने नछुने ।
- उडाएर आएको सामानबाट चोट लाग्ने जोखिम हुने भएकोले चनाखो रहने ।
प्रकाशित मिति: बुधबार, वैशाख १६, २०८३
