काठमाडाैँ । किसानको बारीमा केरा अझै पनि सस्तो मूल्यमा बिक्री भइरहेको छ, तर उपभोक्ताको भान्सामा पुग्दा यसको मूल्य आकाशिएको छ।
किसानले एक दर्जन केरा ५० देखि ५५ रुपैयाँमै बेचिरहेका छन् भने बजारमा त्यही केरा ३५० देखि ४ सय रुपैयाँसम्ममा बिक्री भइरहेको छ।
सरकारले भारतबाट केरा आयातमा लगाएको रोकको कारण नेपालमा केराको मुल्य बृद्धि भएको विश्लेषण भईरहेका छन् । तर केराको मूल्य किसानबाट बजारसम्म पुग्दा झन्डै ६ देखि ७ गुणा बढेको छ।
उत्पादनस्थलबाट उपभोक्तासम्म पुग्ने क्रममा बिचौलिया, ढुवानी, भण्डारण र खुद्रा व्यापारका नाममा मूल्य धेरै गुणा बढेको छ । बजार अनुगमन र कालो बजारी नियन्त्रण गर्न सके केरा आयात गर्नु नपर्ने केरा उत्पादक किसान दिपेन्द्र थारुले सीआइएनसँग बताउनुभयो ।
यसैबिच, नेपाल केरा उत्पादक महासंघले स्वदेशी उत्पादन संरक्षणका लागि केरा आयात नखुलाउन सरकारसँग आग्रह गरेको छ।
महासंघका अनुसार उचित नीति र सहयोग पाए नेपाल केरामा १ देखि २ वर्षभित्रै आत्मनिर्भर बन्न सक्नेछ । महासंघले आज विज्ञप्ती जारी गर्दै हालै सरकारले केरा आयातमा रोक लगाएको निर्णयलाई सकारात्मक कदम भन्दै निरन्तरता दिन माग गरिएको छ ।
महासंघले विदेशी केरासँगै आउने फ्युजारियम विल्ट, पानामा जस्ता रोगले राष्ट्रिय जैविक सुरक्षामा खतरा पु¥याउन सक्ने भन्दै आयात रोक्नुपर्ने उनीहरूको चेतावनी छ।
महासंघले हालको मूल्य वृद्धि अस्थायी भएको दाबी गर्दै देशभर ४० देखि ५० लाख नयाँ केराका बिरुवा रोपिँदै गरेको जनाएको छ।
प्रकाशित मिति: मंगलबार, वैशाख ८, २०८३
