तुलसीपुर । पत्रकार चेतन ओलीमाथि आक्रमण गर्ने एक युवकलाई इलाका प्रहरी कार्यालय तुलसीपुरले पक्राउ गरेको छ ।
पक्राउ पर्नेमा तुलसीपुर उपमहानगरपालिका–७ पर्सेनी निवासी सागर सुवेदी रहेको प्रहरीले जनाएको छ ।
रेडियो प्रकृति एफएमको स्टुडियोमै हिजो दिउँसो साढे ४ बजे प्रवेश गरी न्युज डेस्क प्रमुख ओलीमाथि आक्रमण गरिएको स्टेशन म्यानेजर ओपेन्द्र बस्नेतले जानकारी दिनुभयो ।
उहाँका अनुसार ओली समाचार तयारीमा व्यस्त रहेका बेला बाहिरबाट ढोका ढकढक्याएपछि खोल्नेबित्तिकै सुवेदीले आक्रमण गरेका थिए । घटनाको जानकारी पाएलगत्तै इलाका प्रहरी कार्यालय तुलसीपुरबाट खटिएको प्रहरी टोलीले सुवेदीलाई नियन्त्रणमा लिएको हो ।
घटनाप्रति रेडियो प्रकृति एफएमले भत्र्सना गर्दै दोषीमाथि कडाभन्दा कडा कारबाहीको माग गरेको छ ।
रेडियो सञ्चालक समितिका अध्यक्ष नारायण खनालद्वारा जारी विज्ञप्तिमा समाचार निर्माणको क्रममा रहेका पत्रकारमाथि गरिएको यस्तो आक्रमणलाई केवल व्यक्तिगत हमला नभई प्रेस स्वतन्त्रता र लोकतान्त्रिक मूल्य–मान्यतामाथिको गम्भीर प्रहारका रूपमा उल्लेख गरिएको छ ।
विज्ञप्तिमा स्टुडियो जस्तो सुरक्षित र संवेदनशील कार्यस्थलमै भएको यस्तो घटना अत्यन्तै निन्दनीय र अस्वीकार्य रहेको जनाइएको छ ।
सञ्चारकर्मीहरूको सुरक्षा सुनिश्चित गर्न, यस्ता घटना दोहरिन नदिन तथा स्वतन्त्र पत्रकारिताको संरक्षण गर्न राज्यका सम्बन्धित निकाय गम्भीर बन्नुपर्नेमा जोड दिइएको छ ।
प्रकाशित मिति: शुक्रबार, वैशाख ४, २०८३
