काठमाडौँ । नयाँ वर्ष २०८३ आजदेखि सुरु भएको छ । वर्षको पहिलो दिनलाई उल्लासमय बनाउन विभिन्न पर्यटीकीयस्थलहरूमा भीड लागेको छ ।
एकआपसमा शुभकामना आदानप्रदान पनि आजको दिनमा महत्वपूर्ण मानिन्छ ।
आज सूर्यले मीन राशिको भोग समाप्त गरी मेष राशिमा प्रवेश गर्ने दिन भएकाले वैशाख सङ्क्रान्ति अर्थात् मेष सङ्क्रान्तिको रूपमा पनि मनाउने गरिएको छ ।
दिवसको अवसरमा शुभकामना सन्देश दिँदै राष्ट्रपति रामचन्द्र पौडेलले नयाँ वर्ष देशको साझा राष्ट्रिय लक्ष्य बनाउने र त्यसलाई प्राप्त गर्न सङ्कल्प गर्ने दिनका रूपमा रहेको बताउनुभएको छ ।
उहाँले लक्ष्य त्यसै प्राप्त नहुने र लक्ष्य प्राप्त गर्न सङ्कल्प र साधना आवश्यक पर्ने सन्देशमा उल्लेख गर्नुभएको छ ।
उपराष्ट्रपति रामसहायप्रसाद यादवले नयाँ वर्षलाई केही नौलो कामको थालनी, सकारात्मक सोचको विकास, भ्रातृत्व भाव र स्वस्थ जीवनशैलीका लागि नवसङ्कल्प लिने अवसरका रूपमा उपयोग गर्न अनुरोध गर्नुभएको छ ।
शुभकामना व्यक्त गर्दै उहाँले नववर्षले व्यक्तिगत जीवनमा अनुशासन, स्थिरता र सकारात्मक भावना जगाउने उल्लेख गर्नुभएको छ ।
नयाँ वर्षको अवसरमा शुभकामना सन्देश दिँदै प्रधानमन्त्री बालेन्द्र शाहले सबै नागरिकमा सुख, शान्ति र समृद्धिको शुभकामना व्यक्त गर्नुभएको छ ।सामाजिक सञ्जालमार्फत शुभकामना सन्देश दिँदै उहाँले सबैको सुस्वास्थ्य र कल्याणको कामना गर्नुभएको हो ।
प्रकाशित मिति: मंगलबार, वैशाख १, २०८३
