काठमाडौँ । गृहमन्त्री सुधन गुरुङले विपद्मा परेका नागरिकको तत्कालै उद्धारका लागि दुई वटा हेलिकप्टर तयारी हालतमा राख्न निर्देशन दिनुभएको छ ।
चैत १७ गते सशस्त्र प्रहरी बल नेपाल प्रधान कार्यालयको निरीक्षण भ्रमणमा जानुभएका गृहमन्त्री गुरुङले विपद् व्यवस्थापनमा सशस्त्र प्रहरी कर्मचारीहरुले आफ्नो ज्यानको प्रवाह नगरी नागरिकहरुको उद्धार कार्यमा खटिएकोमा धन्यवाद समेत दिनुभयो ।
उहाँले आम नागरिकको जीउज्यान भन्दा ठूलो पैसा नभएको उल्लेख गर्नुहुँदै विपद्मा परेका नागरिकहरूको सेवा, सुरक्षा गर्नको लागि नेपाल सरकार, गृहमन्त्रालय लगायत सुरक्षार्मीहरु तयारी हालतमा रहन निर्देशन समेत दिनुभयो ।
गुरुङले विगत केही वर्ष अगाडि सशस्त्र प्रहरी बल नेपाल विपद् व्यवस्थापन तालिम शिक्षालय कुरिनटारबाट विपद् व्यवस्थापन सम्बन्धी तालिम समेत लिएको स्मरण गर्नहुँदै कोभिड–१९ महामारी र सीमा नाकामा नेपाल झण्डा राख्ने जस्ता कार्यमा सशस्त्र प्रहरी बल नेपालसँग नजिक भएर काम गरिसकेको बताउनुभयो ।
गुरुङले सशस्त्र प्रहरी बल नेपालमा कार्यरत सम्पूर्ण सशस्त्र प्रहरी कर्मचारीहरुलाई विपद् सुरु हुनु आगाडि नै तयारी हालतमा रहन निर्देशन दिनुकोसाथै सशस्त्र प्रहरी बल नेपालको जनशक्ति अब व्यारेकमा होईन फिल्डमा हुनुपर्ने धारणा राख्नुभयो ।
ड्युटिको समयमा जुनसुकै ठाउँमा परिचालन हुदाँ नागरिक र सुरक्षाकर्मी एउटै हो भन्ने भावना बोकी सबैमा नम्र व्यवहार गर्नुपर्ने उल्लेख गर्नुहुदै विपद्मा परेका नागरिकको उद्धारमा खटिदाँ नागरिकको मात्र उद्धार नभई उद्धारमा खटिने सुरक्षाकर्मीको आफ्नो सुरक्षा अपनाई परिचालन हुने व्यवस्था ल्याउनुपर्नेमा मन्त्रालयले काम गरिरहेको पनि बताउनुभयो ।
गृहमन्त्री गुरुङले सीमा क्षेत्रमा हुने अवैध चोरीपैठारी तथा तस्करी रोक्न मन्त्रालय कठोर भएर अगाडि वढ्ने बताउनुहुदै त्यस्ता कार्यमा कुनै पनि सशस्त्र प्रहरी कर्मचारीहरु संलग्न नरहन आग्रह गर्नुभयो ।
गुरुङले कार्यक्षेत्रमा परिचालित हुदाँ आईपरेका समस्या समाधनको लागि सशस्त्र प्रहरी बल नेपालमा कानूनी व्यवस्था स्पष्ट नभएको र बनाउनको लागि मन्त्रालय सकारात्मक रहेको बताउनुहुदै नेपाल प्रहरी तथा सशस्त्र प्रहरीका कर्मचारीहरु सगँसगै काम गरेको हुदाँ सशस्त्र प्रहरी कर्मचारीहरुको समस्या समाधान गर्न आफू हरदम तयार रहेको उल्लेख गर्नुभएको सशस्त्र प्रहरीका सहप्रवक्ता शैलेन्द्र थापाले बताउनुभयो ।
प्रकाशित मिति: बुधबार, चैत १८, २०८२
