काठमाडौँ । पूर्व प्रधानमन्त्री एवं नेकपा एमाले अध्यक्ष केपी शर्मा ओलीलाई प्रहरीले पक्राउ गरेको विरोधमा एमालेले देशव्यापी आन्दोलन र विरोधका कार्यक्रम सार्वजनिक गरेको छ ।
अध्यक्ष ओलीलाई प्रहरीले जेनजी आन्दोलनपछि गठित जाँचबुझ आयोगको सिफारिस कार्यान्वयनको लागि भन्दै बिहान भक्तपुरको गुण्डीस्थित निवासबाट पक्राउ गरेको थियो ।
बिहान बसेको एमाले सचिवालय बैठकले अध्यक्ष ओलीलाई तत्काल रिहा गर्न माग गर्दै कानुनी तथा राजनीतिक रूपमा सशक्त प्रतिबाद गर्ने, प्रत्येक जिल्लाको सदरमुकाममा आज अपराह्न ३ बजे जनसङ्गठनहरूको तर्फबाट विरोध प्रदर्शन गर्ने निर्णय गरेको नेता महेश बस्नेतले जानकारीदिनुभयो ।
उहाँका अनुसार प्रत्येक जिल्लामा भोलि चैत १५ गते मध्यान्ह १२ बजे जिल्ला पार्टी कमिटीको आयोजनामा व्यापक प्रदर्शनसहित प्रमुख जिल्ला अधिकारीको कार्यालयमा विरोधपत्र बुझाउने र लोकतन्त्र र कानुनी राज्यका पक्षधर सबै दलहरूसँग संवाद र सहकार्य गर्ने निर्णय सचिवालय बैठकले गरेको छ ।
प्रकाशित मिति: शनिबार, चैत १४, २०८२
