काठमाडौँ । यही फागुन २१ मा भएको प्रतिनिधि सभाको निर्वाचन अन्तर्गत समानुपातिकको अन्तिम नतिजा आज आइसक्ने भएको छ ।
निर्वाचन आयोगका अनुसार आज बेलुकासम्ममा समानुपातिकको पनि अन्तिम नतिजा आएपछि आगामी चैत ५ गतेभित्र सबै प्रक्रिया पूरा गरेर राष्ट्रपति समक्ष विवरण पठाइने छ ।
सीआईएनसँग कुराकानी गर्दै आयोगका सूचना अधिकारी सुमन घिमिरेले प्रत्यक्षतर्फको अन्तिम नतिजा आइसकेको र समानुनपातिकको पनि सबै विवरण आएपछि आगामी सरकार र संसदका बारेमा विवरण पठाइने बताउनुभयो ।
यो समाचार तयार पार्दासम्ममा समानुपातिकतर्फको हालसम्ममा १ करोडभन्दा धेरै मत गणना सकिएको छ र राष्ट्रिय स्वतन्त्र पार्टी (रास्वपा) ले सबैभन्दा धेरै मत पाएको छ ।
रास्वपाले ४९ लाखभन्दा धेरै मत प्राप्त गरेको छ। दोस्रो स्थानमा रहेको नेपाली काँग्रेसले १६ लाखभन्दा धेरै मत पाएको छ । तेस्रो स्थानमा रहेको नेकपा (एमाले) ले १३ लाखभन्दा धेरै मत पाएको छ ।
नेपाली कम्युनिष्ट पार्टी ७ लाखभन्दा धेरै मत पाएर चौथो स्थानमा रहेको छ । श्रम संस्कृति पार्टीले ३ लाखभन्दा धेरै मत पाएको छ भने राष्ट्रिय प्रजातन्त्र पार्टीले हालसम्म ३ लाख २१ हजारभन्दा धेरै मत पाएको छ ।
प्रकाशित मिति: मंगलबार, फागुन २६, २०८२
