काठमाडौँ । अस्ति भएको प्रतिनिधि सभाको निर्वाचन अन्तर्गत हालसम्म निर्वाचन आयोगले २४ स्थानको नतिजा सार्वजनिक गरेको छ ।
आयोगका अनुसार हालसम्ममा सबैभन्दा धेरै स्थानमा राष्ट्रिय स्वतन्त्र पार्टी (रास्वपा) ले १८ स्थानमा जितेको छ भने ९९ स्थानमा अग्रता कायम राखेको छ ।
मोरङ क्षेत्र नम्बर ४ मा सन्तोष राजवंशी, क्षेत्र नम्बर ६ मा रुबिना आचार्य, धनुषा ३ मा मनिष झा, महोत्तरी १ मा प्रमोदकुमार महतो, काठमाडौँ १ मा रन्जु न्यौपाने, काठमाडौँ ३ मा राजुनाथ पाण्डे र ४ बाट रास्वपाकै पुकार बम निर्वाचित हुनुभएको आयोगको भनाइ छ ।
रास्वपाबाट काठमाडौँ ५ का उम्मेदवार सस्मित पोखरेल, काठमाडौँ ७ बाट गणेश पराजुली, क्षेत्र नम्बर ८ बाट विराजभक्त श्रेष्ठ, ९ बाट डोलप्रसाद अर्याल, काठमाडौँ १० मा प्रदीप बिष्ट, कास्की २ बाट उत्तमप्रसाद पौडेल, ३ बाट बिना गुरुङ, स्याङ्जा १ बाट धनन्जय रेग्मी, बाँके १ बाट सुरेशकुमार चौधरी, ३ बाट खगेन्द्र सुनार र रुपन्देही ४ मा कन्हैया बनिया निर्वाचित हुनुभएको छ ।
आयोगका अनुसार नेपाली काँग्रेसले हालसम्ममा ४ स्थानमा जित हासिल गरेको र ११ स्थानमा अग्रस्थानमा छ ।
तेह्रथुम १ मा सन्तोष सुब्बा, मनाङ १ बाट टेकबहादुर गुरुङ, मुस्ताङ १ बाट योगेश गौचन थकाली र दैलेख १ बाट बासना थापा विजयी हुनुभएको छ । नेकपा एमालेको तर्फबाट बाँके २ मा मोहम्मद इस्तियाक राई निर्वाचित हुनुभएको छ भने एमालेले ११ स्थानमा अग्रता कायम राखेको छ ।
नेपाली कम्युनिष्ट पार्टीबाट संयोजक पुष्पकमल दाहाल प्रचण्ड रुकुम पूर्वबाट विजयी हुनुभएको छ भने ११ स्थानमा नेपाली कम्युनिष्ट पार्टीका उम्मेदवारले अग्रता कायम राखेका छन् रास्वपाले भने विजयी भएका उम्मेदवारलाई खुसियालीमा कुनै पनि प्रकारको जुलुस वा र्याली ननिकाल्न मातहतका निकायलाई निर्देशन दिएको छ ।
प्रकाशित मिति: शनिबार, फागुन २३, २०८२
