काठमाडौँ । आज भएको प्रतिनिधि सभाको निर्वाचनमा करिब ६० प्रतिशत मत खसेको निर्वाचन आयोगले जनाएको छ ।
आयोगले आज साँझ निकालेको विज्ञप्तिमा देशभरबाट प्राप्त विवरण अनुसार करिब ६० प्रतिशत मत खसेको प्रारम्भिक अनुमान गरिएको उल्लेख छ । खसेको मत प्रतिशतका बारेमा यसको विस्तृत विवरण सङ्कलन कार्य जारी रहेको पनि आयोगले जनाएको छ ।
निर्वाचनमा मतदान कार्य विहान ७:०० बजेदेखि साँझ ५:०० बजेसम्म शान्तिपूर्ण र उत्साहजनक रूपमा सम्पन्न भएको पनि आयोगको भनाइ छ ।
मतदान कार्यमा सहयोग, सहकार्य र समन्वयका लागि निर्वाचन आयोगले नेपाल सरकार, प्रदेश सरकार, स्थानीय तह, सुरक्षा निकाय, मुख्य निर्वाचन अधिकृत, निर्वाचन अधिकृत, निर्वाचनमा संलग्न कर्मचारी, सुरक्षाकर्मी, राजनीतिक दल, उम्मेदवार, आम मतदाता, पर्यवेक्षक संस्थाहरू, सञ्चारमाध्यम तथा सम्पूर्ण सरोकारवालाहरूमा हार्दिक आभारसहित धन्यवाद दिएको छ ।
मतदानका लागि तोकिएको समयभित्र मतदान केन्द्रमा प्रवेश गरेका केही केन्द्रहरूमा मतदानको कार्य जारी रहेको उल्लेख गर्दै छिटफुट अवरोधका घटनाबाहेक निर्वाचन शान्तिपूर्ण रूपमा सम्पन्न भएको निर्वाचन पर्यवेक्षणमा खटिएका राष्ट्रिय तथा अन्तर्राष्ट्रिय पर्यवेक्षकहरूको प्रारम्भिक विवरणबाटसमेत प्राप्त भएको आयोगले बताएको छ ।
मतदान कार्यको समाप्तिसँगै मतपेटिका सुरक्षित रूपमा सङ्कलन भएपछि मतगणना कार्य तत्काल सुरु हुने जनाइएको छ । दुर्गम १५ जिल्लाका विकट क्षेत्रबाट हेलिकप्टरमार्फत मतपेटिका ढुवानी गरिने भनिएको छ । जसमध्ये ताप्लेजुङ, रसुवा, दोलखा, बझाङ र रुकुम (पूर्वी भाग) का सम्पूर्ण मतपेटिका आजै सम्वन्धित मतगणना स्थलमा पुऱ्याउने लक्ष्य छ भने संखुवासभा, सोलुखुम्बु, गोरखा र रुकुम (पश्चिम भाग), मनाङ तथा बाजुरा र हुम्लाका मतपेटिका शुक्रवार विहानसम्म सम्बन्धित मतगणना स्थलमा पु-याइने पनि आयोगले भनेको छ ।
प्रकाशित मिति: बिहीबार, फागुन २१, २०८२
