काठमाडौँ । संयुक्त अरब इमिरेट्सको जायद अन्तर्राष्ट्रिय विमानस्थलमा इरानले गरेको आक्रमणमा एक नेपालीको निधन भएकोमा नेपालले स्तब्ध भएको भन्दै दुख व्यक्त गरेको छ ।
परराष्ट्र मन्त्रालयले एक विज्ञप्ति जारी गर्दै एक नेपालीको निधन भएको बारेमा यूएई निकायबाट प्राप्त जानकारीप्रति गहिरो स्तब्धता र दुःख व्यक्त गरेको जनाएको हो ।
मन्त्रालयले सक्रिय द्वन्द्वको अवस्थामा सबै सरोकारवाला पक्षहरूले सर्वसाधारण नागरिकहरूको सुरक्षा, संरक्षण सुनिश्चित गर्नुपर्ने आवश्यकता पुनः दोहोर्याएको छ।
मन्त्रालयले अन्तर्राष्ट्रिय मानवीय कानुनका प्रावधानहरू सधैँ सम्मान र पूर्ण रूपमा पालना गरिनुपर्नेमा पनि जोड दिएको छ।
मन्त्रालयले शोकाकुल परिवारप्रति हार्दिक समवेदना व्यक्त गर्दै मृतकको पार्थिव शरीर स्वदेश फिर्ता ल्याउनेलगायत सम्भव सबै सहयोग प्रदान गर्ने प्रतिबद्धता पनि व्यक्त गरेको छ।
प्रकाशित मिति: सोमबार, फागुन १८, २०८२
