काठमाडौँ । नेपाल आर्थिक पत्रकार समाज (सेजन) र सामुदायिक रेडियो प्रसारक संघ (अकोराब) नेपालबीच आर्थिक पत्रकारिता र वित्तीय साक्षरता प्रवर्द्धन गर्ने उद्देश्यसहित रणनीतिक साझेदारी सुरू भएको छ।
शुक्रबार आज रणनीतिक साझेदारी पत्रमा अकोराबका अध्यक्ष अर्जुन गिरी र सेजनका अध्यक्ष भगवत भट्टराईले हस्ताक्षर गर्नुभयो ।
दुवै संस्थाले यस सहकार्यले आर्थिक विषयमा सचेत नागरिक निर्माण, स्थानीय तहसम्म नीतिगत बहस विस्तार र समुदायकेन्द्रित आर्थिक पत्रकारितालाई सुदृढ बनाउन सहयोग पुर्याउन यो साझेदारी गरेको बताएका छन्।
सम्झौताले विशेषगरी निर्वाचनजस्ता विशेष समयमा नीति निर्माता र नागरिकबीच आर्थिक संवादलाई सुदृढ बनाउने लक्ष्य लिएको छ।
साझेदारी अन्तर्गत फागुन २१ मा हुने निर्वाचनला लक्षित गरी दलहरूका घोषणापत्र केन्द्रित समावेशी अर्थतन्त्र र आर्थिक सुशासनलगायतका विषयमा कार्यक्रम सञ्चालन गरिने भएको छ।
समझदारी पत्रमा आर्थिक विषयलाई तथ्यमा आधारित, निष्पक्ष र सन्तुलित ढंगले प्रस्तुत गर्ने प्रतिबद्धता पनि व्यक्त गरिएको छ।
साझेदारीमा हस्ताक्षर पश्चात अकोराब अध्यक्ष अर्जुन गिरीले बजेट वक्तव्य लगायत अन्य आर्थिक विषयलाई सरल भाषामा व्याख्या गरी समुदायसम्म पुर्याउने र वित्तीय साक्षरता अभिवृद्धिका कार्यक्रम सञ्चालन गर्न यस समझदारीले योगदान दिने विश्वास व्यक्त गर्नुभयो ।
समुदायस्तरमा रहेकाहरूलाई लक्षित गरी सरल र व्यवहारीक रूपमा वित्तिय साक्षरताको अभियान चलाउन यस साझेदारीले बाटो खोलेको छ, गिरीले भन्नुभयो ।
उहाँले सामुदायिक रेडियोहरूमा आवद्ध पत्रकारलाई आर्थिक बिषयको रिर्पोटिङ्गको लागि आवश्यक सीप र विषयगत दक्षताको लागि दुवै संस्थाले संयुक्त रुपमा काम गर्ने प्रतिवद्धता समेत जनाउनुभयो ।
यस सहकार्यले सामुदायिक रेडियो र समुदायमा काम गर्ने पत्रकारहरूलाई समेटेर आर्थिक पत्रकारितासम्बन्धी तालिम, गोष्ठी र क्षमता अभिवृद्धि कार्यक्रम सञ्चालन गर्न थप सहज हुने विश्वास सेजनका अध्यक्ष भागवत भट्टराईले गर्नुभयो ।
साझेदारी लगत्तै रेडियो तथा डिजिटल माध्यमका लागि आर्थिक कार्यक्रम र जनचेतनामूलक सन्देश उत्पादन गरिने समझदारीपत्रमा बताइएको छ।
सेजनको विज्ञता उपयोग गर्दै संयुक्त छलफल तथा अन्तर्क्रिया कार्यक्रम आयोजना गरिने र अकोराबको देशव्यापी र सामुदायिक रेडियो सञ्जालमार्फत ती कार्यक्रमहरू प्रसारण गरिने व्यवस्थासमेत मिलाइने भट्टराईले बताउनुभयो ।
आर्थिक समुन्नति र विकासको लागि नीतिहरूको तर्जुमा मात्र नभई त्यसको व्यवहारीक कार्यान्वयन पनि आवश्यक हुन्छ । यसको लागि समुदायस्तरसम्म बजेट, उद्यमशीलता र अन्य आर्थिक बिषयमा साक्षरता आवश्यक छ, अकोराबका निर्देशक शिरोमणि ढुङ्गानाले भन्नुभयो ।
समुदायस्तरमा जोडिएको सामुदायिक रेडियोहरू र ती रेडियोहरूमा आवद्ध सञ्चारकर्मीहरूले सरल भाषामा वित्तिय साक्षरता र अन्य आर्थिक विषयमा विषयबस्तु प्रबर्धन गर्दा त्यसले समग्र आर्थिक विकासको बारेमा सकारात्मक धारणा बन्ने बताउँदै उहाँले सेजन र अकोराबबीचको समझदारीले आर्थिक महत्वका बिषयहरूमा साझा धारणा बनाई समुदायस्तरसम्म सन्देश प्रवाह गर्न सहज हुने विश्वास व्यक्त गर्नुभयो ।
सम्झौताअनुसार कार्यक्रम उत्पादन तथा प्रसारणको समन्वय, प्राविधिक सहयोग उपलब्ध गराउने र सामुदायिक रेडियोमार्फत सामग्री वितरण सुनिश्चित गर्ने जिम्मेवारी अकोराबको रहनेछ। आर्थिक विषयमा विशेषज्ञता, स्रोत व्यक्ति र आवश्यक तथ्याङ्क उपलब्ध गराउने तथा सामग्रीको गुणस्तर सुनिश्चित गर्न सहयोग गर्ने दायित्व सेजनको हुनेछ।
सेजन आर्थिक पत्रकारहरूको छाता संगठन हो । अकोराब देशैभरका ३८० भन्दा बढी सामुदायिक रेडियोहरुको छाता संगठन हो।
प्रकाशित मिति: शुक्रबार, फागुन ८, २०८२
