काठमाडौँ । हरेक वर्ष फेब्रुअरी १३ तारिखमा मनाइने विश्व रेडियो दिवस आज विशेष कार्यक्रम गरी नेपालमा पनि मनाइँदैछ ।
यसपालीको रेडियो दिवसको नारा ‘रेडियो र कृत्रिम बौद्धिकता (एआई), एआई एउटा उपकरण हो, आवाज होइन’ भन्ने तय गरिएको छ ।
दिवसको अवसरमा सामुदायिक रेडियो प्रसारक सङ्घ (अकोराब) नेपालको आयोजनामा काठमाडौँमा विशेष कार्यक्रम हुँदैछ ।
अकोराबका अध्यक्ष अर्जुन गिरीले एक शुभकामना सन्देश जारी गर्दै रेडियो सुन्ने माध्यम र शैली फेरिए पनि यसको महत्व कहिल्यै नघट्ने उल्लेख गर्दै देशभरका सामुदायिक रेडियोलाई सङ्कटकाबीच पनि सूचना र जानकारी नागरिकसम्म पुर्याउने अभियानलाई निरन्तरता दिन अनुरोध गर्नुभएको छ ।
कृत्रिम बौद्धिकताको सहयोगमा सूचना सङ्कलनमा सहजता थपे पनि तथ्य जाँच र सूचनाको व्यवस्थापन र सही रुपमा प्रसारण सामग्री निर्माणमा रेडियोकर्मीको भूमिका महत्वपूर्ण हुने उहाँको भनाइ छ ।
युनेस्कोद्वारा सन् २०११ मा घोषित र सन् २०१२ देखि मनाउन सुरु गरिएको यस दिवसले सूचना, शिक्षा र मनोरञ्जनको सशक्त माध्यमका रूपमा रेडियोको भूमिकालाई उजागर गर्दै आएको छ ।
युनेस्कोका अनुसार कृत्रिम बौद्धिकताले ध्वनि गुणस्तर सुधार, अडियो अभिलेख व्यवस्थापन, वास्तविक समयमा अनुवाद र श्रवण-दृष्टि अशक्त व्यक्तिहरूका लागि पहुँचयोग्य सामग्री निर्माणमा सहयोग पुर्याउन सक्छ।
तर रेडियोको आत्मा भनेको स्टुडियोभित्र बसेर समाचार वाचन गर्ने मानवीय आवाज, प्रत्यक्ष प्रसारणमा स्रोतासँग गरिने संवाद र आपतकालमा दिइने विश्वसनीय सूचना नै रहेको विज्ञहरूले औँल्याउँदै आएका छन् ।
प्रकाशित मिति: शुक्रबार, फागुन १, २०८२
