काडमाडौँ । सशस्त्र प्रहरी महानिरीक्षक राजु अर्यालले समाजमा हुने भ्रामक र मिथ्या सूचनालाई चिरेर राज्यले लिएको लक्ष्य प्राप्तीमा सङ्गठनमा कार्यरत बहालवाला तथा अवकाश प्राप्त सशस्त्र प्रहरी कर्मचारीहरु एकजुट हुनुपर्ने बताउनुभएको छ ।
सशस्त्र प्रहरी बल नेपाल नम्बर २४ कालिका गण कास्कीको परिसरमा निर्माण भएको नेपाल पूर्व सशस्त्र प्रहरी संघ भवन उद्घाटनको क्रममा महानिरीक्षक अर्यालले यस्तो बताउनुभएको हो ।
उहाँले सशस्त्र प्रहरी कर्मचारीहरु आगामी फागुन २१ गते हुने प्रतिनिधि सभा सदस्य निर्वाचनलाई सफलपूर्वक सम्पन्न गराउन विभिन्न निर्वाचन क्षेत्रमा तैनाथ रहँदै आईरहेको बताउनुहुँदै सो कार्यमा अवकाश प्राप्त सशस्त्र प्रहरी कर्मचारीहरुको भूमिकासमेत उल्लेखनीय रहने विश्वास व्यक्त गर्नुभयो ।
महानिरीक्षक अर्यालले अवकाश प्राप्त सशस्त्र प्रहरी कर्मचारीहरुले समाजमा हुने वा हुनसक्ने सम्भावित घटना तथा दुर्घटना लगायतका कुराहरुलाई संगठनसम्म पुर्याएर त्यस्ता कार्यहरुलाई समयमा नै सहयोगतर्फ लाग्नुपर्ने बताउनुभयो ।
महानिरीक्षक अर्यालले अवकाश प्राप्त सशस्त्र प्रहरी कर्मचारीहरुसँग अन्तरक्रिया कार्यक्रमसमेत गर्नुभएको थियो ।
सशस्त्र प्रहरी महानिरीक्षक राजु अर्यालले सशस्त्र प्रहरी बल नेपालमा भर्ना भएका निर्वाचन प्रहरीको भूमिका राष्ट्रिय सुरक्षामा समेत महत्वपूर्ण हुने उल्लेख गर्नुहुँदै उनीहरुलाई विपद् सूचकको रुपमा स्थापित गर्न निर्देशन दिनुभएको छ ।
प्रकाशित मिति: बुधबार, माघ २८, २०८२
