काठमाडौँ । नेकपा एमालेका अध्यक्ष केपी शर्मा ओलीले फागुन २१ को प्रतिनिधि सभाको निर्वाचनपछि बन्ने सरकारमा प्रधानमन्त्रीको दाबी गरेकाहरूबीच खुला बहस आवश्यक रहेको बताउनुभएको छ ।
एमालेले अध्यक्ष ओलीलाई भावी प्रधानमन्त्रीका रुपमा प्रस्तुत गर्दै झापा ५ बाट उम्मेदवार उठँएको छ भने नेपाली काँग्रेसबाट सभापति गगन कुमार थापा र राष्ट्रिय स्वतन्त्र पार्टीले वरिष्ठ नेता बालेन्द्र शाहलाई भावी प्रधानमन्त्रीका रूपमा घोषणा गरेको छ ।
प्रधानमन्त्रीका उम्मेदवारका बीचमा संवाद गर्नुपर्ने बारेमा सामाजिक सञ्जालमा बहस सुरु भएपछि ओलीको यस्तो प्रतिक्रया आएको हो ।
आज बिहान सामाजिक सञ्जालमार्फत विचार राख्दै उहाँले यसपालीको निर्वाचनमा देशमा ऐतिहासिक भूमिका खेलेका दल, यसअघिको चुनावमा खुलेको दल र भर्खरै खुलेका केही नयाँ दलहरु पनि प्रधानमन्त्रीको उम्मेदवार तोकेर आएको उल्लेख गर्दै देशको नेतृत्व गर्न खोज्ने दलहरुका एजेण्डा के छन्, देश निर्माणमा यसअघि के काम गरे, अब गर्ने कामको रोडम्याप, योजना र खाका के छ ? भनेर उठेका प्रश्नहरूमा आमनेसामने बहसको माग अत्यन्त सकारात्मक रहेको धारणा राख्नुभएको छ।
उहाँ लेख्नुहुन्छ, "यस्तो पब्लिक डिबेटमा आमने सामने उभिएर यसअघि हामीले के के गर्यौँ भन्ने तथ्य र अब कसरी काम गर्छौं भन्ने एजेण्डा प्रस्तुत गर्न म तयार छु। चुनावपछि प्रधानमन्त्रीको उम्मेदवारमा प्रस्तुत भएका सबैलाई सिधा प्रश्न सोध्न खडा गरिएको मञ्चमा उभिएर आफ्ना एजेण्डा राख्ने प्रतिबद्धता जनाउँछु। त्यस्तो पब्लिक डिबेट आयोजना गरेर सबै पक्षलाई ल्याउन आग्रह गर्दछु।"
प्रकाशित मिति: आइतबार, माघ ११, २०८२
