काठमाडौँ । नेपाली सेना फोटो तथा बृहत प्रदर्शनी २०८२ आजदेखि सुरु भएको छ ।
जङ्गी अड्डामा आयोजित एक कार्यक्रममा बीच प्रधान सेनापति महारथी अशोक राज सिग्देलले नेपाली सेना फोटो तथा बृहत् प्रदर्शनी- २०८२ को शुभारम्भ गर्नु भएको हो ।
आम नागरिकलाई नेपाली सेनाका विविध गतिविधिबारे जानकारी गराउने उद्देश्यले फोटो प्रदर्शनीको आयोजना गरिएको नेपाली सेनाले जनाएको छ ।
प्रदर्शनीको उद्घाटन कार्यक्रमका बिच प्रधान सेनापति सिग्देलले नेपाली सेना फोटो प्रतियोगिता-२०८२ का उत्कृष्ट तीन जना गैर सैनिक फोटोग्राफरहरू, तीन वटा नेपाली सेनाका युनिटहरू र एक जना जनसम्पर्क तथा सूचना निर्देशनालयका फोटोग्राफरलाई पुरस्कार तथा प्रमाणपत्र वितरण गर्नुका साथै मूल्याङ्कन समितिका सदस्यहरूलाई कदर पत्रद्वारा सम्मानित गर्नु भएको छ ।
कार्यक्रम पश्चात् प्रधान सेनापति लगायत अतिथिहरूले प्रदर्शनीको अवलोकन गरेका थिए ।
प्रदर्शनीमा सैनिक पोशाक, सैनिक ब्यान्ड, सैनिक हवाई सेवा, घोडचढी, जङ्गल तथा पहाडी युद्धकला, विशेष फौजको भूमिका, राष्ट्रिय निकुञ्ज तथा वन्यजन्तु आरक्ष संरक्षण, शान्ति सेना, विकास निर्माण, विपद् व्यवस्थापन, खेलकुद, सैनिक विद्यालयहरू, राष्ट्रिय सेवा दल लगायतका गतिविधिहरू समेट्ने गरी कुल ३१ वटा स्टलहरू राखिएका छन् ।
सेना दिवस-२०८२ को अवसरमा यही माघ ७ गतेसम्म बिहान १० बजेदेखि बेलुका ५ बजेसम्म सञ्चालन हुने प्रदर्शनीमा आम नागरिकलाई जङ्गी अड्डाको पश्चिम गेटबाट निःशुल्क प्रवेशको व्यवस्था गरिएको नेपाली सेनाले जनाएको छ ।
प्रदर्शनीको समुद्घाटन समारोहमा पूर्व प्रधान सेनापतिहरू, बलाधिकृत, नेपाल प्रहरी तथा सशस्त्र प्रहरी बल नेपालका महानिरीक्षकहरू, राष्ट्रिय अनुसन्धान विभागका मुख्य अनुसन्धान निर्देशक, जनसम्पर्क तथा सूचना निर्देशनालयका पूर्व निर्देशकहरू, सैनिक सहचारीहरू, अधिकृत, सकलदर्जा, सञ्चारकर्मीहरू लगायतको उपस्थिति रहेको थियो ।
प्रकाशित मिति: आइतबार, माघ ४, २०८२
