काठमाडौँ । काठमाडौँ महानगर प्रमुख बालेन शाहले राष्ट्र निर्माणको अभियानमा आफूलाई साथ दिन अपिल गर्नुभएको छ ।
भूकम्प सुरक्षा दिवसको अवसरमा आज एक सन्देश सार्वजनिक गर्दै उहाँले राष्ट्र निर्माण कुनै व्यक्तिका लागि नभइ देशका लागि आवश्यक भएको भन्दै उक्त अभियानमा आफूलाई विश्वास गर्न पनि भन्नुभएको छ ।
सन्देशको धेरै शब्दमा विकासको आवशयक्ता र गुणस्तरको व्याख्या गर्दै बालेनले अन्तिममा लेख्नुभएको छ" संस्थागत विकास र समुन्नति कुनै कागजमा मात्र होइन, हरेक जनताले अनुभूत गर्न पाउने कुरा हो। यसको लागि आशाको सञ्चार मात्र नभई कटिबद्ध भएर इमानदारीपूर्वक देशलाई अघि बढाउनुपर्छ। हामी र हाम्रो पुस्ताको मात्र नभई भविष्यका पुस्तालाई सुरक्षित र आशालाग्दो देश हस्तान्तरण गर्ने नीति हो।"
स्ट्रक्चरल इन्जिनियरको रूपमा आफूले बुझेको कुरा भन्दै उहाँले थप्नुभएको छ "देशलाई अब अल्पकालीन निर्णय होइन, दीर्घकालीन दृष्टिकोण चाहिएको छ। अब लोकप्रिय नारा होइन, इमानदार नेतृत्व चाहिएको छ। हामी राजनीतिमा आउनुको मूल उद्देश्य नै नेपाललाई सुरक्षित बनाउने, नेपाललाई दिगो बनाउने र नेपाललाई व्यवस्थित बनाउने हो। नीति यस्तो बन्नेछ, जसले संकट आउनुअघि तयारी हुनेछ। संरचना यस्तो बन्नेछ, जसले विपद् सहन सकोस्। शासन यस्तो बनोस्, जसले जनताको विश्वास जितोस्। यो अभियान कुनै एक व्यक्तिको होइन। यो सुरक्षित भविष्य चाहने सबै नेपालीको साझा अभियान हो। सबैको साथ, सहयोग र विश्वाससहित अब राष्ट्र निर्माणको यात्रामा अघि बढ्ने समय आएको छ।"
प्रकाशित मिति: शुक्रबार, माघ २, २०८२
