काठ्माडाैँ । नेपाली काँग्रेस भित्र देखिएको आन्तरिक विवाद चर्किदै जाँदा पार्टीको एक समुहले विशेष महाधिवेशन आह्वान गरेको छ।
विशेष महाधिवेशन सञ्चार तथा प्रचार प्रसार समितिले अाज काठमाडौंमा एक पत्रकार सम्मेलन आयोजना गर्दै यही पुस २७ र २८ गते विशेष महाधिवेशन गर्ने आह्वान गरेको हो।
महाधिवेशनका लागि भृकुटीमण्डप पहिले नै बुक गरिसकिएको र शान्ति सुरक्षाको लागि स्थानीय प्रशासनसँग पत्राचार भईसकेको समितिले जनाएको छ। साथै, महाधिवेशन व्यवस्थापनका लागि विभिन्न उपसमितिहरु पनि गठन गरिएको जानकारी दिइएको छ ।
विशेष महाधिवेशन पक्षधर समूहका अनुसार पार्टीले २०८२ पुस २८ भित्र १५औं महाधिवेशन सम्पन्न गर्ने कार्यतालिका सार्वजनिक गरे पनि तोकिएको समयमा महाधिवेशन हुन सकेन। यही कारण विशेष महाधिवेशन अनिवार्य भएको उनीहरूको दाबी छ।
“विधानको मर्म र भावनाअनुसार विशेष परिस्थितिमा विशेष महाधिवेशन गर्नु आवश्यक भएको छ। त्यसैले सबै केन्द्रीय महाधिवेशन प्रतिनिधिहरूलाई सक्रिय सहभागिताका लागि आग्रह गर्दछौं।”
पार्टीका महामन्त्रीद्वय गगन थापा र विश्वप्रकाश शर्मा पक्षले नियमित महाधिवेशनको कार्यतालिका प्रभावित भइसकेकाले अब विशेष महाधिवेशन नै विकल्प भएको बताउनुभएको छ ।
तर सभापति शेरबहादुर देउवा पक्षले भने फागुन २१ गते हुने प्रतिनिधि सभा निर्वाचनअघि विशेष महाधिवेशन गर्न नसकिने अडान लिएको छ। यसले कांग्रेसभित्रको विवाद अझ स्पष्ट रूपमा सतहमा आएको देखिन्छ।
प्रकाशित मिति: बुधबार, पुस २३, २०८२
