काठमाडौँ । नेपाल वायुसेवा निगमले विदेशमा रोजगारीका लागि जाने नेपाली श्रमिक यात्रुहरूलाई लक्षित गर्दै विशेष छुटसहित नयाँ भाडादर लागू गरेको छ ।
निगमले काठमाडौंबाट दमाम, दोहा, दुबई र क्वालालाम्पुर गन्तव्यतर्फ यात्रा गर्ने श्रमिक यात्रुका लागि प्रत्येक उडानमा १० वटा सिटमा साधारण भाडामा १० प्रतिशत सहुलियत उपलब्ध गराउने निर्णय गरेको हो ।
निगमका अनुसार, श्रमिक वर्गलाई सहज र किफायती यात्रा सुविधा उपलब्ध गराउने उद्देश्यले यो योजना ल्याईएको हो ।
नेपालस्थित कार्यालयका टिकट काउन्टरमार्फत आवश्यक कागजात पेस गरी प्राप्त गर्न सकिनेछ । निगमले यस सम्बन्धमा थप जानकारी चाहिने यात्रुहरूले केन्द्रीय कार्यालयमा सम्पर्क गर्न आग्रह गरेको छ ।
प्रकाशित मिति: शनिबार, मंसिर १३, २०८२
