काठमाडौँ । आगामी फागुन २१ का लागि तय भएको प्रतिनिधि सभा सदस्यको निर्वाचनमा नेपाली सेना परिचालन गर्न राष्ट्रिय सुरक्षा समितिको बैठकले मन्त्रिपरिषद्मा सिफारिस गर्ने निर्णय गरेको छ ।
आज बसेको परिषद्को बैठकले फागुन २१ को चुनाव स्वतन्त्र, निष्पक्ष र भयरहित वातावरणमा सम्पन्न गर्न नेपालको संविधानको धारा २ सय ६६ को उपधारा (१) बमोजिम नेपाली सेनाको परिचालन गर्न नेपाल सरकार, मन्त्रिपरिषद् समक्ष सिफारिस गर्ने निर्णय गरेको परिषद्का सदस्य सचिव, रक्षा मन्त्रालयका सचिव सुमनराज अर्यालले जानकारी दिनुभयो ।
उहाँका अनुसार परिषद्को आठौँ वार्षिक प्रतिवेदन (आ.व.०८१।८२) को मस्यौदा माथि छलफल भएर उक्त मस्यौदालाई आवश्यक संशोधनसहित स्वीकृत गरी नेपालको संविधानको भाग २८ को धारा २६६ को उपधारा (३) बमोजिम राष्ट्रपति समक्ष पेश गर्ने निर्णय पनि भएको छ ।
बैठकमा राष्ट्रिय सुरक्षामा आउन सक्ने विविध चुनौतीहरु तथा राष्ट्रिय तथा अन्तर्राष्ट्रियस्तरमा देखापरेका पछिल्ला घटनाक्रमले राष्ट्रिय सुरक्षामा पार्न सक्ने प्रभाव तथा चुनौतीहरु र अपनाउनु पर्ने भावी रणनीतिहरुको सम्बन्धमा पनि छलफल भएको छ ।
प्रकाशित मिति: बिहीबार, मंसिर ४, २०८२
