काठमाडौं । सरकारले यो वर्ष हिमपातबाट हिमाली तथा उच्चपहाडी २९ र शीतलहरबाट तराई-मधेसका २१ जिल्ला प्रभावित हुन सक्ने अनुमान गरेको छ ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणले हिउँदमा हिमाली तथा उच्चपहाडी र तराई-मधेसमा सम्भावित हिमपात र शीतलहरबाट हुन सक्ने जोखिम न्यूनीकरणका निम्ति बेग्लाबेग्लै राष्ट्रिय कार्ययोजना, २०८२ को मस्यौदा तयार पारेको छ ।
त्यही कार्ययोजनामा प्रभावित हुनसक्ने जिल्लामा विशेष सावधानी र हिमपात तथा शीतलहरबाट हुने सक्ने जोखिम न्यूनीकरण गर्न विशेष रणनीतिक कार्य समावेश गरिएको प्राधिकरणले जनाएको छ ।
प्राधिकरणले सरोकारवालासँगको छलफल र परामर्शपछि उक्त कार्ययोजनाको मस्यौदालाई अन्तिम रूप दिएको प्रमुख कार्यकारी अधिकृत (सीईओ) दिनेशप्रसाद भट्टले सीआईएनलाई जानकारी दिनुभयो ।
उहाँका अनुसार यो कार्ययोजना सार्वजनिक गर्न प्राधिकरणले आज बिहान ११ बजे पत्रकार सम्मेलन गर्दैछ ।
हिमाली तथा उच्चपहाडी जिल्लामा सामान्यतया मंसिरदेखि फागुनसम्म भारी हिमपात र तराई÷मधेसमा शीतलहरको प्रभाव हुने गरेको छ ।
कोशी, मधेस, गण्डकी, लुम्बनी र सुदूरपश्चिम प्रदेशका जिल्लाहरू शीतलहरबाट बढी प्रभावित हुने अनुमान छ ।
कार्ययोजनाअनुरूप मंसिर १५ गतेभित्र हिमपातबाट प्रभावित हुन सक्ने क्षेत्र तथा लक्षित वर्गको पहिचान गरी तथ्यांक अद्यावधिक र लाभग्राहीको प्राथमिकता निर्धारण गर्ने रणनीति तय गरिएको छ ।
सरकारले हिमपात र शीतलहरबाट हुन सक्ने सम्भावित क्षति तथा जनजीवनमा पर्ने असर न्यूनीकरण गर्ने उद्देश्यले पहिलो पटक राष्ट्रिय कार्ययोजना जारी गर्न लागेको हो ।
प्रकाशित मिति: बुधबार, मंसिर ३, २०८२
