कृषिमा युवाको सहभागिता बढाउन सरकारले कृषिमा लगानी बढाउनुपर्ने युवा किसानहरुले बताएका छन्। धनगढीमा हिजो भएको जलवायु परिवर्तन, कृषि प्रणाली र कृषिमा युवाको भूमिका विषयक अन्तरक्रिया कार्यक्रममा सहभागी युवा किसानहरुले यस्तो बताएका हुन् ।
सामुदायिक रेडियो प्रसारक सङ्घ नेपाल (अकोराब) र खाद्य तथा कृषि सङ्गठन (एफएओ) को संयुक्त आयोजनामा भएको कार्यक्रममा सहभागीहरुले लक्षित किसानलाई अनुदान सजिलै उपलब्ध गराउने व्यवस्था गर्न, युवा लक्षित कृषि कार्यक्रमहरू लागू गर्न र कृषि पेशालाई सम्मानित बनाउने खालका योजना ल्याउन सुझाव दिएका छन्। साथै, उनिहरुले किसानका लागि बीमा र राहत योजना सबैको पहुँचमा पुग्ने खालको हुनुपर्ने माग समेत गरेका छन्।
किसानलाई दिईने अनुदानका सामग्रीहरुलाई सजिलो तरिकाले पाउने खालका बनाउनु पर्ने, प्राकृतिक विपद्ले क्षति पुगेका बाली अन्नको पनि सहज तवरले राहत वा सहयोग दिइनुपर्ने सहभागीहरुले छलफलको क्रममा बताएका थिए।
कृषि ज्ञान केन्द्र कैलालीका वरिष्ठ कृषि प्रसारक अधिकृत टेक बिष्टले पछिल्लो समयमा युवाको संलग्नताका कारण कृषिमा राम्रो परिणाम देखिएको बताउनुभयो। उहाँले राज्यले यान्त्रिकीकरणमा गरेको लगानीले युवालाई कृषितर्फ आकर्षित गरेको बताउनुभयो । यस्तै, ड्रयागन फल, किवी, केरा, मासु उत्पादनलगायत क्षेत्रमा युवाको सहभाागितामा उल्लेखनीय प्रगति भएको जानकारी दिनरभयो।
पुष्पखेती किसान शुसिला विष्टले पनि पुष्पखेतीबाट राम्रो आम्दानी हुन थालेपछि युवामा कृषिमा प्रतिको रुचि बढेको बताउनुभयो।त्यस्तै, कृषी निर्देशनालयका निमित्त प्रमुख टिकेन्द्र कुश्मीले कृषि अध्ययन गरेका र विदेशबाट कृषि सिप सिकेर फर्किएका युवालाई लक्षित गर्दै विभिन्न योजना लागू गरिएको जानकारी दिनुभयो। उहाँका अनुसार स्थानीय तहमा करारमा युवा प्राविधिक नियुक्ति र मौरी, बाख्रा, कुखुरा पालनजस्ता कार्यक्रम अघि बढाइएका छन्। कृषि पढेका अध्ययन गरेका युवाहरुलाई ८८ वटा स्थानीय तहमा कृषि एवम् पशुपंक्षी क्षेत्रमा १७६ जनालाई करारमा पकेट क्षेत्रमा काम गर्न राखेको र जिल्लामा युवा लक्षित मौरी पालन, कुखुरा पालन, बाख्रा पालन, फलफुल, तरकारीमा समेट्ने योजना रहेको बताउनुभयो ।
भूव्यवस्था, कृषी तथा सहकारी मन्त्रालयका सूचना अधिकारी राजकुमार झाले युवालाई कृषि व्यवसायमा आकर्षित गर्न स्टार्टअप र कृषि कर्जा अनुदान योजना सञ्चालनमा रहेको बताउनुभयो । तत्कालै फल दिने काम नभएको केही समय रोक्नुपर्ने भएकाले युवा स्वरोजगार कार्यक्रमहरु पनि रहेको उहाँको भनाइ छ ।
नेपाल पत्रकार महासंघ सुदूरपश्चिम प्रदेश अध्यक्ष भरत शाहले वास्तविक किसानभन्दा पनि अन्यले अनुदान पाउने प्रवृत्तिको अन्त्य गर्नुपर्ने बताउनुभयो। उहाँले सकारात्मक उदाहरणका कथा र समाचारमार्फत समाजमा प्रेरणा फैलाउन पत्रकारहरुलाई आग्रह गर्नुभयो।
कार्यक्रममा प्रदेशभरका पत्रकार, किसान, युवाहरु, सरकारी तथा गैरसरकारी संस्था, अकोराब र एफएओका प्रतिनिधिहरुको सहभागिता थियो। अकोराबका वरिष्ठ उपाध्यक्ष गोविन्दप्रसाद देवकोटा, कोषाध्यक्ष तुला अधिकारी, महासचिव भक्त स्याङतान र प्रदेश अध्यक्ष वेदप्रसाद तिमिल्सिनाको पनि उपस्थिति रहेको थियो।
प्रकाशित मिति: बिहीबार, कात्तिक २७, २०८२
