पूर्वपश्चिम राजमार्गको बाराको पथलैया–निजगढ सडकखण्डमा आज बिहान हात्तीको आक्रमणबाट ट्रक चालकको मृत्यु भएको छ।
मृत्यु हुने ट्रक चालक जीतपुरसिमरा १ का ४० वर्षीय राजकुमार चौधरी रहेको प्रहरीले जनाएको छ।
आज बिहान, रातिदेखि राजमार्ग अवरुद्ध पार्दै आएको हात्तीले सडकमा रोकेको ट्रकमा आक्रमण गर्न खोजेपछि चौधरी ज्यान बचाउन ट्रकबाट ओर्लेर भाग्दै गर्दा हात्तीले लखेटेको हो । घटना राजमार्गको १२ किलोमिटर क्षेत्रमा भएको थियो।
पछिल्लो राति करिब साढे बजे जंगलबाट निस्किएको हात्तीले राजमार्गमा रहेका सवारी साधनमा पनि आक्रमण गरेको थियो। भारतीय नम्बर प्लेटको माइक्रोबस र स्थानीय पिकअप भ्यान समेत पल्टाइएको छ। केही यात्रु सामान्य घाइते भएका छन्।
घटनाको खबर पाएपछि पर्सा राष्ट्रिय निकुञ्जका नेपाली सेना, सशस्त्र प्रहरी र नेपाल प्रहरीले रातभरि सडकमा सुरक्षा व्यवस्था गरेका थिए। डिभिजन वन कार्यालय बाराका प्रमुख राजिव झाले सो हात्तीलाई घरपालुवा हात्ती र सुरक्षाकर्मीको सहयोगमा दिउँसो जंगलमा फर्काइएको जानकारी दिनुभएको सामुदायिक रेडियो निजगढ बाराले जनाएको छ ।
प्रकाशित मिति: सोमबार, कात्तिक २४, २०८२
