काठमाडौँ । सरकारले मधेश प्रदेश प्रमुखमा सुरेन्द्र लाभको नाम सिफारिस गरेको छ । आज बसेको मन्त्रिपरषद्को बैठकले उहाँलाई नियुक्तिका लागि राष्ट्रपति समक्ष सिफारिस गरेको हो ।
सीआईएनसँग कुराकानी गर्दै सिफारिसमा पर्नुभएका लाभले संविधान र कानुनको अधिनमा रही काम गर्ने बताउनुभयो ।
मन्त्रिपरिषद् बैठकले यसअघिका प्रदेश प्रमुख सुमित्रा सुवेदी भण्डारीलाई पदमुक्त गर्ने निर्णय गरेको सरकारका प्रवक्ता, सञ्चार तथा सूचना प्रविधि मन्त्री जगदीश खरेलले जानकारी दिनुभयो ।
मधेश प्रदेशका निवर्तमान प्रमुख भण्डारीले एमालेका नेता सरोजकुमार यादवलाई मुख्यमन्त्री नियुक्त गरेपछि मधेस केन्द्रित सात राजनीतिक दलले असंवैधानिक कदम भन्दै विरोध सुरु गरेका छन् ।
आज बिहान भण्डारीले बर्दिवासको एक होटलमा यादवलाई मुख्यमन्त्रीको शपथ ग्रहण गराउनुभएको थियो ।
नेपाली काँग्रेस, माओवादी केन्द्र, जनता समाजवादी पार्टी (जसपा), लोकतान्त्रिक समाजवादी पार्टी (लोसपा), जनमत पार्टीसहितका सात दलीय गठबन्धनले मुख्यमन्त्रीमा यादवको नियुक्तिलाई संविधानविपरीत भन्दै सर्वोच्च जाने निर्णय गरेका छन् ।
संविधानको धारा १६८(२) अनुसार गठबन्धनका तर्फबाट सरकार गठनका लागि समर्थन जुटिसकेको अवस्थामा प्रदेश प्रमुखले एमालेको नेतृत्वमा सरकार बनाउन ‘गैरसंवैधानिक कदम’ चालेको उनीहरुको आरोप छ ।
प्रकाशित मिति: सोमबार, कात्तिक २४, २०८२
