काठमाडौँ । शिक्षा मन्त्री महावीर पुनले केही युवा अभियन्ता र अगुवाहरूले गाँजा लगायतका नशालु पदार्थ (सर्को तानेर) सेवन गरेर जथाभावी लेख्ने गरेको भन्दै असन्तुष्टि जनाउनुभएको छ ।
सामाजिक सञ्जालमार्फत विचार सार्वजनिक गर्दै मन्त्री पुनले सर्को तानेको बेलामा केही पनि नबोल्न र नलेख्न अनुरोध गर्नुभएको छ ।
मन्त्री पुनको यो सन्देश अघि गएराति काठमाडौँ महानगरपालिकाका मेयर बालेन शाहको सामाजिक सञ्जालबाट कुटनीतिमा समेत खलल पुग्ने गरी छाडा शब्द सामाजिक सञ्जालमा लेखेको भन्दै विरोध भइरहेको छ ।
कतिपयले मन्त्री पुनले बालेनप्रति नै सङ्केत गरेको अडकल गरे पनि मन्त्री पुनको स्टाटसमा कुनै व्यक्तिलाई तोकिएको छैन । बालेनको सामाजिक सञ्जालको अकाउन्टबाट सार्वजनिक भएको उक्त स्टाटस भने अहिले हटिसकेको छ।
प्रकाशित मिति: आइतबार, कात्तिक १६, २०८२
