काठ्माडाैँ । नेपालको भन्सार राजश्व सङ्कलन तीन दशमलव सात प्रतिशतले बढेको छ।
भन्सार विभागका अनुसार चालु आर्थिक वर्षको पहिलो दुई महिना साउन र भदौमा ७८ अर्ब १६ करोड रुपैयाँ राजश्व सङ्कलन भएको छ।
गत आर्थिक वर्षको सोही अवधिमा ७४ अर्ब २७ करोड सङ्कलन भएको थियो। जुन अहिलेको तुलनामा ३ दशमबल ७ प्रतिशतले कम हो ।
तर यस वर्ष राजश्व सङ्कलन बढेपनि, सरकारले तोकेको ९४ अर्ब २१ करोडको लक्ष्य भने पूरा हुन सकेको छैन। लक्ष्यको तुलनामा करिब १७ प्रतिशतले कम राजश्व सङ्कलन भएको विभागले जनाएको छ। भन्सार विभागका सूचना अधिकारी किशोर बर्तौलाका अनुसार आयात घट्नु, विदेशी मुद्रा सन्तुलनमा दबाब र अन्तर्राष्ट्रिय व्यापारमा आएको सुस्त गतिका कारण राजश्व लक्ष्यमा पुग्न नसकिएको हो।
लक्ष्यअनुसारको राजश्व सङ्कलनको सम्भावनाबारे सीआईएनसँग कुरा गर्दै अर्थविज्ञ डा. चन्द्रमणी अधिकारीले नेपालको लक्ष्य निर्धारण नै बैज्ञानिक नभएको आरोप लगाउनुभयो । जसका कारण नेपालले हालसम्म लक्ष्यअनुसारको राजश्व सङ्कलन गर्न नसकेको उहाँकाे भनाइ छ। लक्ष्य निर्धारण बैज्ञानिक बनाउने, उत्पादनमुलक क्षेत्रमा लगानी बढाउने र निर्यात बढाउन सकेको खण्डमा राजश्व सङ्कलन बढ्ने उहाँको भनाइ छ ।
गत आर्थिक वर्षमा भन्सार विभागले लक्ष्यको ८३ दशमबल १ प्रतिशत मात्रै राजश्व सङ्कलन गरेको थियो ।
प्रकाशित मिति: शनिबार, कात्तिक ८, २०८२
