जुम्ला । जुम्लामा यस वर्ष मार्सी धानको उत्पादन २० प्रतिशतले बढ्ने अनुमान गरिएको छ ।
कृषि विकास कार्यालय जुम्लाकाअनुसार यस वर्ष रोगकिराको आक्रमण कम भएका कारण धान उत्पादन बढ्ने भएको हो । कार्यालयका अनुसार यो वर्ष पोहोरको तुलनामा ४ हेक्टर भन्दा बढि क्षेत्रफलमा धान लगाईएको छ । जसकारण पनि धान उत्पादन बढ्ने देखिएको हो ।
कार्यालयका अनुसार आर्थिक वर्ष २०८१/८२ मा जुम्लामा करिब ३ हजार मेट्रिक टन मार्सीधान उत्पादन भएको थियो। अहिले देशभर तिहारको रौनक चलिरहेको बेला जुम्लाका किसान भने खेतमै खटिएका छन्।
तर धान काट्न पस्से चलनले धान उत्पादन घटाउने चिन्ता समेत बढाएको सीआईएनसँग कुरा गर्दै कार्यालय प्रमुख रामभक्त अधिकारीले बताउनुभयो ।
पस्ने चलन भन्नाले समुदायमा कुन दिन धान काट्न जाने भनेर टोलले गर्ने निर्णय हो ।
पस्ने निर्णय गरेपछि टोलका सवै किसानले धान काट्न सुरु गर्दछन् । तर कतिपयको धान राम्ररी नपाकेको, चिस्यान कायम नै रहेको तथा मौसमको अवस्था समेत बुझेर नै कतिपय किसानले धान काट्ने गर्दछन् । जसकारण धान बालीका क्षति पुग्ने सम्भाना हुने उहाँको भनाइ छ ।
जुम्लाको मौलिक रैथाने धान प्रजाति मार्सीधान जुम्लाको पहिचान बनेको छ । जुम्लाको सदरमुकाम खलङ्गामा मार्सी चामल प्रतिकेजी १८० रुपैयाँमा बिक्री भइरहेको छ।
प्रकाशित मिति: मंगलबार, कात्तिक ४, २०८२
