काठमाडौँ । सर्वोच्च अदालतमा आजबाट आंशिक रूपमा सेवा सुरु हुने भएको छ ।
गएको भदौ २४ गते जेनजीको आन्दोलनको क्रममा भएको आगजनी, तोडफोड तथा लुटपाटका कारण क्षति भएपछि स्थगित रहेका सेवाहरू आजबाट आंशिक रुपमा सुरु गर्ने निर्णय भएको हो ।
असोज २६ गते बसेको पूर्ण बैठकको निर्णयानुसार, हालसम्म बन्दी प्रत्यक्षीकरणका निवेदन तथा अत्यावश्यक निवेदनको दर्ता र सुनुवाइ मात्र भइरहेकोमा आजदेखि रिट निवेदनहरू, मुलुकी देवानी कार्यविधि संहिता, २०७४ को दफा १ सय ५७ तथा मुलुकी फौजदारी कार्यविधि संहिता, २०७४ को दफा ७३, १ सय ३७ र १ सय ५५ का निवेदन दर्ता र सुनुवाइ हुने सर्वोच्च अदालतले जनाएको छ ।
अन्य सम्पूर्ण सेवाहरू भने अर्को सूचना जारी नभएसम्मका लागि स्थगन नै रहने प्रवक्ता अर्जुनप्रसाद कोइरालाले जानकारी दिनुभयो ।
प्रकाशित मिति: मंगलबार, असोज २८, २०८२
