काठमाडौँ । काठमाडौँ जिल्ला प्रशासन कार्यालयले भोलि कुनै पनि र्याली, सभा वा प्रदर्शन गर्न नपाइने निर्णय गरेको छ। प्रशासनले शान्ति सुरक्षामा चुनौती बढ्ने सम्भावनालाई ध्यानमा राख्दै यस्तो कदम चालेको जनाएको छ ।
प्रमुख जिल्ला अधिकारी ईश्वरराज पौडेलद्वारा आज जारी सूचनामा भोलि काठमाडौँका विभिन्न स्थानमा फरक फरक समूहहरूले मोटरसाइकल र्याली, जुलुस र सभा आयोजना गर्ने तयारी गरिरहेको भन्दै यस्ता कार्यक्रमले आम नागरिकको सुरक्षामा असर पुरर्याउन सक्ने र सार्वजनिक सम्पत्तिमा क्षति हुने जोखिम बढ्ने देखिएकाले पूर्वस्वीकृति विना कुनै पनि कार्यक्रम गर्न नदिने निर्णय गरिएको उल्लेख छ।
प्रशासनले विशेष रूपमा नेकपा एमाले निकट युवा सङ्घले भोलि दिउँसो १ बजे कोटेश्वरदेखि तीनकुनेसम्म मोटरसाइकल र्याली निकाल्ने तयारी गरेको पुष्टि गरेको छ। तर त्यस्तो कार्यक्रमका लागि अनुमति दिइएको छैन।
गत भदौ २३ गते काठमाडौँमा भएको जेनजी आन्दोलनका क्रममा सार्वजनिक तथा निजी सम्पत्तिमा तोडफोड, आगजनीजस्ता घटना भएका थिए। त्यसलाई स्मरण गर्दै प्रशासनले शान्ति र सुरक्षालाई पहिलो प्राथमिकता दिँदै यो निर्णय लिएको स्पष्ट पारेको छ।
स्थानीय प्रशासन ऐन २०२८ को दफा ६ को उपदफा ३ ‘क’ र प्रहरी ऐन २०१२ को दफा १९ अनुसार अनुमति नलिई कुनै पनि किसिमका सभा, जुलुस वा प्रदर्शन गर्न पाइँदैन। प्रशासनले सबैलाई कानुनी प्रावधानको पालना गर्न अनुरोध गर्दै सूचना जारी गरेको छ।
प्रकाशित मिति: शुक्रबार, असोज २४, २०८२
