काठमाडौँ । आगामी फागुन २१ मा हुने प्रतिनिधि सभाको निर्वाचनका लागि आज निर्वाचन आयोगले कार्यतालिका स्वीकृत गरेको छ ।
आयोगले गर्नुपर्ने कार्यहरूलाई समयबद्ध रूपमा सञ्चालन गर्न आयोगबाट आज निर्वाचन कार्यतालिका स्वीकृत भएको आयोगका प्रवक्ता नारायणप्रसाद भट्टराईले सीआईएनसँग बताउनुभयो ।
उहाँका अनुसार स्वीकृत कार्यतालिका अनुसार मंसिर १ गतेदेखि १० गतेसम्म निर्वाचन प्रयोजनको लागि राजनीतिक दल दर्ताको समय तोकिएको छ भने माघ २ गतेदेखि निर्वाचन अधिकृतको कार्यालय स्थापना हुनेछ ।
फागुन ३ देखि १८ गतेसम्म निर्वाचन प्रचारप्रसार हुने र त्यसपछि प्रचारप्रसार निषेधको अवधि रहनेछ। फागुन २१ गते बिहान ७ बजेदेखि बेलुका ५ बजेसम्म मतदान हुने र दुवै निर्वाचन प्रणालीतर्फको मतपेटिका सङ्कलन भएपछि मतगणना सुरु गरिने कार्यतालिकामा उल्लेख छ ।
प्रवक्ता भट्टराईले समानुपातिक निर्वाचन प्रणालीका लागि मङ्सिर १५ गते निर्वाचन अधिकृतको कार्यालय स्थापना हुने र पुस १८ र १९ गते बन्दसूची पेस गर्ने कार्यक्रम रहेको जानकारी दिनुभयो ।
यसबीचमा राजनीतिक दल एवं सरोकारवालासँगको समन्वय र सहकार्यका लागि आयोगले समयसमयमा परामर्श तथा छलफल गर्ने छ ।
आयोगको विज्ञप्तिः
प्रकाशित मिति: सोमबार, असोज २०, २०८२
