काठमाडौँ । सामुदायिक वन उपभोक्ता महासंघ (फेकोफन) नेपालले जेन जी आन्दोलनका कारण ध्वस्त भएका संरचनाको पुनर्निर्माणमा स्वदेशी काठ उपयोग गर्ने नीति ल्याउन सरकारसँग माग गरेको छ ।
महासङ्घ सङ्घीय कार्यसमितिको बैठकका निर्णय सार्वजनिक गर्न आज काठमाडौंमा आयोजित पत्रकार सम्मेलनमा फेकोफनका अध्यक्ष ठाकुर भण्डारीले जेन–जी आन्दोलनपछि विकसित घटनाक्रममा भएको क्षतिको पुनर्निर्माणका लागि नेपाली काठ प्रयोग गर्न र त्यसका लागि अहिले भएका कानुनी बाधा फुकाउन सरकारलाई आग्रह गर्नुभयो ।
काठ निकासीका लागि सबै अधिकार डीएफओलाई दिइएको र यसमा झन्झटिलो प्रक्रिया रहेको उल्लेख गर्दै सरकारले कानुनी बाधा हटाएर नेपालकै काठ प्रयोगका लागि सरोकारवाला निकायलाई प्रोत्साहित गर्नुपर्ने उहाँको भनाइ छ ।
अध्यक्ष भण्डारीले किसानलाई उठिबास लगाउने बाँदर र बँदेल मार्न तथा बेच्ने गरी सरकारले स्पष्ट कानुन बनाउनुपर्नेमा पनि जोड दिनुभयो ।
फेकोफनका महासचिव पार्वता गौतमले महासङ्घले युवा पुस्तालाई नेतृत्वमा ल्याउन र वनमा उद्यमशीलता विकासका लागि फेकोफनले अभियान नै चलाएको जानकारी दिँदै आगामी दिनमा युवा नेतृत्व र सहभागीलाई प्राथमिकता दिइने बताउनुभयो ।
प्रकाशित मिति: मंगलबार, असोज ७, २०८२
