काठमाडौँ । चितवनको इच्छाकामना गाउँपालिकाको तुइन खोलामा झरेको पहिरोका कारण अवरुद्ध भएको मुग्लिन-नारायणगढ सडकखण्ड सञ्चालन हुन समय लाग्ने भएको छ ।
आज बिहानैदेखि पहिरो न्छाउन काम सुरु गर्ने तयारी प्रहरीको थियो तर लेदोसहितको पहिरो झर्नेक्रम नरोकिएका कारण काम सुरु हुन नसकेको मुग्लिन प्रहरीले जनाएको छ ।
जिल्ला ट्राफिक प्रहरी कार्यालय चितवनका अनुसार मुग्लिनबाट साढे २ किलोमिटर नारायणगढतर्फ इच्छाकामना गाउँपालिकाको तुइन खोला भन्ने स्थानमा माथिबाट ठूलो पहिरो खसेर सडक अबरुद्ध छ ।
काम सुरु गरेको करिब ४ घण्टापछि मात्रै सडक सञ्चालनमा आउने प्रहरीको भनाइ छ ।
हिजो साँझ सवा ७ बजेतिर तुइनखोलामा पहिरो खसेपछि राजमार्गको दुवैतर्फ सवारी साधनको लाइन लागेको छ । यो सडक भएर गन्तव्यमा पुग्न हिँडेका यात्रु अलपत्र परेका छन् ।
प्रकाशित मिति: शनिबार, असोज ४, २०८२
