नवनियुक्त ऊर्जा, भौतिक पुर्वाधार र सहरी विकास मन्त्री कुलमान घिसिङले पदभार सम्हाल्दै नेपाल विद्युत् प्राधिकरणको लामो समयदेखि उठ्न बाँकी बक्यौता रकम तत्काल संकलन गर्ने पहिलो निर्णय गर्नुभएको छ ।
शपथग्रहणलगत्तै उहाँ महाराजगञ्जस्थित आगलागीमा क्षति पुगेको प्रहरी भवन र उपचारमा रहेका घाइतेहरूलाई अवलोकन गर्न त्रिवि शिक्षण अस्पताल पुग्नुभएको थियो । त्यसपछि मन्त्रालय पुग्नुभएका घिसिङले विभिन्न व्यावसायिक घरानाले नतिरेको करिब सवा ८ अर्ब रुपैयाँ बक्यौता तत्काल उठाउन निर्देशन दिनुभयो ।
यसअघि दुई कार्यकाल प्राधिकरणका कार्यकारी निर्देशक रहिसकेका घिसिङलाई बक्यौता संकलनको अभियानकै बीच तत्कालीन प्रधानमन्त्री केपी शर्मा ओलीले पदमुक्त गर्नुभएको थियो । पदभार सम्हाल्ने क्रममा घिसिङले क्षतिग्रस्त संरचनाको पुनर्निर्माणका लागि विशेष कोष खडा गर्ने घोषणा पनि गर्नुभयो ।
उहाँले उक्त कोषमा नेपालभित्रै मात्र नभई विदेशमा रहेका नेपालीलाई समेत योगदान दिन आग्रह गर्नुभयो । उहाँले यसअघि जस्तै दातृ निकायहरूको निरन्तर सहयोगको अपेक्षा पनि व्यक्त गर्नुभयो ।
प्रकाशित मिति: सोमबार, भदौ ३०, २०८२
