काठमाडौँ । सामुदायिक रेडियो प्रसारक सङ्घ (अकोराब) नेपालले समुदायको आवाज बोल्ने रेडियोमाथिको आक्रमण रोक्न र तोडफोडका घटनामा संलग्नलाई कारबाहीको माग गरेको छ ।
अकोराबका कार्यवाहक अध्यक्ष गोविन्द देवकोटाले आज विज्ञप्ति निकाल्दै यही भदौ २४ गते जेन–जी पुस्ता भन्दै आएका युवाहरूको एक समूहले बुटवलको रेडियो जागरणको भवनमा आगजनी र तोडफोड गरेको, इलामको नेपालवाणि एफएममा तोडफोड गरेको र दार्चुलाको लेकम गाउपालिकामा सञ्चालित सामुदायिक रेडियो लोकदर्पणको कार्यालयमा युवाहरूको समूह प्रवेश गरी तोडफोड र रेडियोकर्मीलाई धम्की दिइएको उल्लेख गर्दै यस्ता घटना रोक्न र दोषीलाई कारबाहीको लागि सरोकारवालासँग माग गर्नुभएको छ ।
‘आन्दोलनका क्रममा सामुदायिक रेडियोमा तोडफोड गर्ने र धम्की दिने घटनाप्रति सामुदायिक रेडियो प्रसारक सङ्घ घोर निन्दा र भर्त्सना गर्दछ । समुदायले सञ्चालन गरेको रेडियो भएकाले यी घटनाले समुदायको सूचनाको हकमा समेत आघात पुगेको छ ।’ कार्यवाहक अध्यक्ष देवकोटाले थप्नुभएको छ, ‘घटनामा संलग्न जोकोहीलाई कारबाहीको दायरामा ल्याउन र आगामी दिनमा समुदायले सञ्चालन गरेका सामुदायिक रेडियो र रेडियोकर्मीको रक्षा अनि अभिव्यक्ति स्वतन्त्रताको सम्मान गर्न संघ सम्बद्ध सबै पक्षसँग आह्वान गर्दछ ।’
सामुदायिक रेडियोहरूको आवाज सदैव नागरिक, लोकतन्त्र र शान्ति–समृद्ध नेपालका पक्षमा रहने बताउँदै सामुदायिक रेडियो प्रसारक सङ्घ नेपाल सरकार, राजनीतिक दल, नागरिक समाज र सम्पूर्ण सरोकारवालालाई आन्दोलनमा सहिद भएका परिवारलाई उचित क्षतिपूर्ति र घाइतेहरूको उपचार तथा जीविकोपार्जनको सुनिश्चित गर्न माग गर्नुभएको छ ।
आन्दोलनका क्रममा भएका घटनाबारे सत्यतथ्य छानबिन गरी दोषीलाई कानुनी दायरामा ल्याउन उच्चस्तरीय छानबिन आयोग बनाउन, युवापुस्ताले उठाएका मुद्दा, मूल्य र आकाङ्क्षालाई सम्बोधन गर्ने खालको नीति र व्यवहार अङ्गीकार गर्न, लोकतान्त्रिक अभ्यासलाई मजबुत बनाउन, पारदर्शी र निष्पक्ष निर्वाचन तोकिएको समयमा सम्पन्न गर्न आवश्यक वातावरण सुनिश्चित गर्न, सुशासन, पारदर्शिता, भ्रष्टाचार नियन्त्रण र नागरिकमैत्री सेवामा तत्काल सुधार गर्न पनि अकोराबले माग गरेको छ ।
सामुदायिक रेडियोलगायत स्वतन्त्र सञ्चारमाध्यमहरूको भूमिकालाई सम्मान गर्दै प्रेस स्वतन्त्रता सुनिश्चित गर्न पनि कार्यवाहक अध्यक्ष देवकोटाले सरोकारवाला निकायको ध्यानाकर्षण गराउनु भएको छ ।
प्रकाशित मिति: आइतबार, भदौ २९, २०८२
