दसैँका लागि सुकिला नोट सटही आजदेखि सुरु भएको छ। यो सुविधा असोज १० गतेसम्म चल्ने राष्ट्र बैङ्कले जनाएको छ ।
सुकिला नोट नेपाल राष्ट्र बैंकको थापाथलीस्थित मुद्रा व्यवस्थापन विभाग, प्रदेशका कार्यालयहरू विराटनगर, जनकपुर, वीरगञ्ज, पोखरा, सिद्धार्थनगर, नेपालगञ्ज र धनगढीबाट साट्न सकिनेछ ।
त्यस्तै, अधिकांश वाणिज्य बैंकहरूले पनि आफ्ना शाखाबाट सुकिला नोट सटही सेवा दिनेछन् । ग्राहकहरूले नजिकैको बैङ्कमा गएर सजिलै साट्न सक्ने व्यवस्था गरिएको राष्ट्र बैंकका सहप्रवक्ता सुमन न्यौपानेले बताउनुभयो ।
यस पटक १८ हजार पाँच सय रुपैयाँसम्म सुकिला नोट साट्न पाइनेछ। ५, १०, २०, ५० र १ सय दरका एक÷एक बण्डल साट्न सकिनेछ। साना दरका केही नोट भने नयाँ हुनेछन्।
नेपाल राष्ट्र बैंकले पहिले दसैंका लागि नयाँ नोट वितरण गर्ने गरेको थियो। तर, नोट छपाइ खर्च धेरै हुने र छिट्टै पुरानो हुने भएकाले हालका वर्षहरूमा नयाँ नोट नभई प्रणालीमै रहेका सुकिला नोट मात्रै सटही गरिँदै आएको छ।
प्रकाशित मिति: आइतबार, भदौ २९, २०८२
