काठमाडौँ । सुशासनको माग गर्दै आन्दोलनमा उत्रिएका युवाहरू, जेन–जीको माग अनुसार पूर्वप्रधानन्यायाधीश सुशीला कार्कीलाई अन्तरिम सरकारको प्रधानमन्त्री बनाउने सहमति जुटेको छ ।
गएराति अबेरसम्म राष्ट्रपति रामचन्द्र पौडेलको उपस्थितिमा भएको छलफलमा यसबारेको सहमति जुटेको शीतल निवास स्रोतको भनाइ छ।
यद्यपि संसद् विघटन गर्ने विषयमा सहमति जुटाउन आज बिहान पनि छलफल हुने भएको छ ।
पहिले संसद विघटन गरेर प्रधानमन्त्रीमा कार्कीले सपथ लिने वा कसरी मिलाउने भन्ने बारेमा कुरा मिल्न बाँकी रहेको शीतल निवास स्रोतको भनाइ छ ।
आज बिहान ९ बजेपछि छलफल गर्ने भन्दै हिजोको बैठक सकिएको अधिवक्ता ओमप्रकाश अर्यालले जानकारी दिनुभयो ।
जेन जीको माग अनुरुप नै पूर्व प्रधानन्याधीश कार्कीलाई नियुक्त गर्ने, आवश्यकताको सिद्धान्त, संविधानको पालना राष्ट्रपतिको कर्तव्य हुने संवैधानिक धारा अनुसार अघि बढ्ने, शान्ती वहाली, जेन जीको अग्रसरतामा भएको आन्दोलनमा भएको नरसंहार र विध्वंसको छानविन र शिघ्र आम निर्वाचनको कार्यादेश अन्तरिम सरकारलाई दिने बारेमा भने सहमति भएको छ ।
प्रधानमन्त्रीको सपथ राष्ट्रपति भवन शितल निवासमा र अस्थायी मुकाम नारायणहिटीमा राख्ने तयारी भएको छ ।
प्रकाशित मिति: शुक्रबार, भदौ २७, २०८२
