काठमाडौं । सामाजिक सञ्जालमाथि सरकारले लगाएको प्रतिबन्धको विरोधमा भइरहेको जेनजीको प्रदर्शन उग्र बन्दै जाँदा एक प्रदर्शनकारीको मृत्यु भएको छ।
प्रहरीको गोली लागेर घाइते भएका ती युवकको नयाँबानेश्वरस्थित सिभिल अस्पतालमा उपचारका क्रममा मृत्यु भएको हो। अस्पतालका निर्देशक मोहन रेग्मीका अनुसार हालसम्म ७० देखि ८० जना घाइतेको उपचार भइरहेको छ। मृत्यु भएकाको परिचय भने अझै खुलेको छैन।
प्रदर्शन नियन्त्रणका क्रममा प्रहरीले चलाएको रबरको गोली लागेर दुई जना पत्रकार घाइते भएका छन्। नयाँ पत्रिकाका फोटो पत्रकार दिपेन्द्र ढुंगाना र नेपाल प्रेसका उमेश कार्कीलाई गोली लागेको हो। उनीहरूलाई उपचारका लागि तत्काल सिभिल अस्पताल लगिएको छ।
काठमाडौंको सुरक्षा अवस्था नियन्त्रण बाहिर जान थालेपछि जिल्ला प्रशासन कार्यालयले कफ्र्यू आदेश जारी गरिसकेको छ। सुरुवातीमा नयाँबानेश्वर तिनकुने क्षेत्रमा मात्रै लगाइएको कफ्र्यूलाई विस्तार गर्दै राष्ट्रपतिको कार्यालय शितल निवास, उपराष्ट्रपतिको कार्यालय लैनचौर, नारायणहिटी दरबार संग्रहालय र सिंहदरबार आसपासका क्षेत्रमा समेत आज दिउँसो १ बजेदेखि राति १० बजेसम्मका लागि कफ्र्यू लगाइएको हो।
प्रदर्शनकारीहरूले पटक पटक संसद् भवनभित्र छिर्न प्रयास गरेका छन्। प्रहरीले त्यसलाई रोक्न अश्रुग्यास, लाठीचार्ज र हवाइफायर समेत गरेको छ। केही आक्रोशित युवाहरू संसद् भवनको २ नम्बर गेटतर्फ धकेलिँदा त्यहाँ तोडफोडको अवस्था सिर्जना भएको थियो।
प्रदर्शनकारीको एक समूह संसद् भवननजिकैको सुरक्षा पोस्टमा चढेर नेपालको झण्डा फहराएका थिए। अरूले पनि त्यहाँ चढ्ने प्रयास गर्दा प्रहरी र प्रदर्शनकारीबीच ढुंगा र पानीको बोतल हानाहान समेत भएको थियो।
जेनजीका युवाहरूले सामाजिक सञ्जालमाथिको प्रतिबन्धसँगै देशमा मौजुदा भ्रष्टाचार, बेथिति र नेताहरुको विलासी जीवनशैलीविरुद्ध आक्रोश व्यक्त गर्दै आजदेखि प्रदर्शन सुरु गरेका हुन्। नयाँबानेश्वर केन्द्रित प्रदर्शन अहिले सिंहदरबार, थापागाउँ हुँदै अन्य क्षेत्रमा समेत फैलिएको छ।
कफ्र्यू आदेश जारी भइसके पनि प्रदर्शन भने अझै रोकिएको छैन।
प्रकाशित मिति: सोमबार, भदौ २३, २०८२
