काठमाडौँ । स्थानीय तह पुनर्संरचनापछि पहिलोपटक देशभरका नगरपालिका तथा गाउँपालिकामा रिक्त वा निमित्त प्रमुख प्रशासकीय अधिकृतको सङ्ख्या शून्यमा झारिएको छ ।
सअघि १०५ नगरपालिका र ८६ गाउँपालिका निमित्तको भरमा सञ्चालन भइरहेकोमा सामान्य प्रशासन मन्त्री भगवती न्यौपानेको सहजीकरणका कारण अब सम्पूर्ण स्थानीय तहमा दरबन्दीअनुसारका प्रमुख प्रशासकीय अधिकृत खटाइएको मन्त्री न्यौपानेको सचिवालयले जनाएको छ ।
निजामती सेवा ऐन, २०४९ अनुसार अवकाशको चरणमा रहेका कर्मचारीहरु बाहेक, मन्त्रालयले पारदर्शिता, कार्यकुशलता र भौगोलिक क्षेत्रको अनुभव दिलाउने गरी प्रमुख प्रशासकीय अधिकृत खटाएको दाबी गरिएको छ ।
यसक्रममा २ वर्षभन्दा बढी मन्त्रालय वा अन्तर्गत कार्यरत, उपत्यका केन्द्रित कार्यालयमै सीमित, स्थानीय तहमा काम नगरेका, प्रदेशमा कामकाजका लागि खटिएका तथा फाजिल वा अतिरिक्त समूहमा रहेका कर्मचारीलाई प्राथमिकतामा राखिएको जनाइएको छ।
इतिहासमै पहिलोपटक गाउँपालिका तथा नगरपालिकामा निमित्तको अभ्यासलाई शून्य पार्नुका साथै बाह्य राजनीतिक दबाब वा स्थानीय तहको मनपरी प्रभाव अन्त्य गरिएको दाबी मन्त्री न्यौपानेको छ ।
"यसअघि निमित्त प्रमुख प्रशासकीय अधिकृतलाई दिईएको आर्थिक वा प्रशासनिक जिम्मेवारी स्वतः रद्ध भएको छ। यससँगै कर्मचारी सरुवामा हुने बाह्य चलखेलको अन्त्य, चक्रिय सरुवा प्रणाली कार्यान्वयनमा सहजता, सुगममा मात्र बस्ने प्रवृत्ति रोकथाम, दुर्गममा समेत सेवाको पहुँच विस्तार, प्रशासनिक न्यायको अनुभूति, सेवा प्रवाहको गति र कार्यकुशलतामा वृद्धि, सुशासन प्रवर्द्धन, साथै जनप्रतिनिधिबाट व्यक्तिविशेष रोज्ने प्रवृत्ति अन्त्य हुने अपेक्षा गरिएको छ।" सङ्घीय मामिला तथा सामान्य प्रशासन मन्त्री न्यौपानेको सचिवालयले दिएको जानकारीमा भनिएको छ ।
प्रकाशित मिति: शुक्रबार, भदौ १३, २०८२
