काभ्रे । काभ्रे जिल्लाको दोस्रो सामुदायिक रेडियो, रेडियो मध्यपूर्वले आफ्नो १८ औं वार्षिकोत्सवको अवसरमा मध्यपूर्व सम्मान २०८२ एवं बृहत साँस्कृतिक कार्यक्रम गरेको छ ।
कार्यक्रमका बीच ६ जना श्रष्टाहरुलाई सम्मान पनि गरिएको छ ।
काभ्रेको पनौती बसपार्क परिसरमा आयोजित एक समारोहबीच रेडियो मध्यपूर्वले शैक्षिक क्षेत्रकोतर्फबाट सरस्वती कँडेल, पत्रकारिता क्षेत्रबाट सामुदायिक सूचना नेटवर्क (सीआईएन) का व्यवस्थापक दीपक आचार्य, कलाकारिता क्षेत्रबाट स्थानीय कलाकार लसुन जोडी लक्ष्मण मातंछे र सुरेन्द्र श्रेष्ठ, समाजसेवी अनिला कायष्थ र संस्थागततर्फ माइती वृद्धाश्रमका प्राणनाथलाई सम्मान गरिएको हो ।
“ग्रामीण सूचनाका लागि सामुदायिक रेडियो” नाराका साथ २०६४ सामा स्थापना गरी २०६५ साल असार १ गतेदेखि प्रसारण सुरु गरेको रेडियो मध्यपूर्व अरनिको जागरण मञ्चले सञ्चालन गर्दै आएको छ ।
कार्यक्रममा सामूदायिक सूचना नेटवर्कका व्यवस्थापक आचार्य, पनौती नगरपालिकाका उपप्रमुख गीता बन्जडासहितका अतिथिहरुले सामुदायिक रेडियो मध्यपूर्वको योगदान र भूमिकाको प्रसंशा गर्दै शुभकाममना व्यक्त गरेका थिए ।
विभिन्न चर्चित कलाकारहरुले गीतसङ्गीतमार्फत मनोरञ्जन दिएका थिए ।
प्रकाशित मिति: बुधबार, भदौ ११, २०८२
