काठमाडौँ । युलेन्स एजुकेशन फाउन्डेशन र बनेपा नगरपालिकाको समन्वयमा काभ्रेपलाञ्चोकमा वृक्षारोपण गरिएको छ ।
फाउन्डेशनले शिक्षा प्रदान गर्न थालेको २० वर्ष पुगेको अवसरमा बनेपा नगरपालिकासँगको सहकार्यमा नाला, काभ्रेपलाञ्चोकमा वृक्षारोपण कार्यक्रम आयोजना गरेको हो ।
बनेपाको काशी भन्ज्याङ क्षेत्रको सार्वजनिक जग्गा र युलेन्स एजुकेशन फाउन्डेशनको निजी स्वामित्वमा रहेको ४०० रोपनी जग्गामा करिब १० हजार बिरुवा रोपिएको थियो ।
युलेन्स स्कुलका विद्यार्थी, शिक्षक तथा कर्मचारीसहित १००० भन्दा बढी व्यक्तिहरूको कार्यक्रममा सहभागिता थियो ।
वृक्षारोपणले युवाहरूमा प्रयोगात्मक शिक्षाको माध्यमबाट वातावरणीय जिम्मेवारीको भावना पनि जगाउने लक्ष्य राखिएको फाउण्डेशनले जनाएको छ ।
कार्यक्रममा परराष्ट्र मन्त्री आरजु राणा देउवाले वातावरणीय संरक्षणमा सबै क्षेत्रको महत्वपूर्ण भूमिका रहेको धारणा राख्नुभयो ।
“हामीले भविष्यको पुस्तालाई साँच्चिकै हस्तान्तरण गर्न सक्ने एकमात्र चीज हाम्रो पृथ्वी हो । त्यसैले, यसको संरक्षण साझा जिम्मेवारी हो । भविष्यका पुस्ताले पनि हामीले झ्याल खोलेर देख्ने निलो आकाश देख्न पाउनुपर्छ । उनीहरूले वर्षा, हिउँद जस्ता ऋतु परिवर्तनको अनुभव गर्न पाउनुपर्छ । यदि हामीले अहिलेको प्रकृति जोगाउन सकेनौं भने उनीहरूले यो सौन्दर्य देख्न पाउने छैनन् । युवाहरूलाई वातावरण संरक्षणमा संलग्न गराउनु नै उनीहरूलाई प्रकृतिप्रति जिम्मेवार बनाउने सबैभन्दा राम्रो कदम हो ।” डा देउवाले नेपाल सरकारको वृक्षारोपण तथा जलवायु परिवर्तन विरुद्धको प्रतिबद्धताको बारेमा प्रकाश पार्दै भन्नुभयो ।
वन तथा वातावरण मन्त्री माननीय श्री ऐन बहादुर शाही ठकुरीले सन् २०४५ सम्ममा शून्य उत्सर्जन प्राप्त गर्ने नेपाल सरकारको अन्तर्राष्ट्रिय प्रतिबद्धताको बारेमा जोड दिनुभयो ।
युलेन्स एजुकेशन फाउन्डेशनका ट्रस्टी हेम सागर बरालले दिगोपनाप्रतिको फाउन्डेशनको अटुट प्रतिबद्धतालाई पुनः स्पष्ट गर्दै भन्नुभयो, “युलेन्स एजुकेशन फाउन्डेशनले नेपाल सरकारद्वारा जलवायु कार्यका लागि उत्प्रेरणा सिर्जना गर्ने प्रयासलाई गर्वका साथ समर्थन गर्छ । बनेपा नगरपालिकासँगको सहकार्यमा आयोजित यो बृहत् वृक्षारोपण कार्यक्रममार्फत हामी सगरमाथा संवादद्वारा अघि सारिएको २० वर्षे सगरमाथा वृक्षारोपण वृहत् अभियानको महत्वाकांक्षालाई गर्वका साथ अगाडि बढाउँदै छौं । यस अभियानमा सहभागी भएर हामी केवल रूख रोप्ने कार्यमा सिमित नभइ, जलवायु परिवर्तनका चुनौतीहरू समाधान गर्न सचेतना, एकता र क्रियाशीलताको सामूहिक प्रयासलाई समेत टेवा पुर्याइरहेका छौँ” ।
बनेपा नगरपालिकाका नगरप्रमुख शान्ति रत्न शाक्यले जलवायु संवादमा बालबालिका तथा युवाको प्रारम्भिक संलग्नताको महत्वका बारेमा धारणा राख्नुभयो ।
रोपिएका बिरुवाहरूको निगरानी दिर्घकालिन संरक्षण बनेपा नगरपालिका र युलेन्स एजुकेशन फाउन्डेशनले संयुक्त रूपमा गर्ने जनाइएको छ ।
प्रकाशित मिति: शनिबार, भदौ ७, २०८२
