सर्लाही । मधेस प्रदेशका सबै ट्राफिक प्रहरीलाई गर्मी, घाम र धूलोबाट जोगाउन कालो चस्मा वितरण गरिएको छ।
नेपाल नेत्रज्योति संघ, मधेस प्रदेशमार्फत ईश्वरपुरस्थित आँखा उपचार केन्द्रलाई प्राप्त ७ सय थान चस्मा ट्राफिक प्रहरीलाई प्रदान गरिएको हो।
कार्यक्रम ईश्वरपुर नगरपालिकाका प्रमुख मनोज आचार्यको अध्यक्षतामा सम्पन्न भयो। कार्यक्रममा सङ्घका केन्द्रीय कोषाध्यक्ष चिजकुमार मास्के, मधेस प्रदेश सभापति रविन्द्रलाल चौधरी, बागमती प्रदेश सभापति ऋषिराम पौडेल, ट्राफिक प्रहरी प्रमुख राजकुमार सिलवाललगायत आठवटै जिल्लाका ट्राफिक प्रहरी सहभागी थिए।
प्रदेशका विभिन्न स्थानमा पूर्व–पश्चिम राजमार्ग पुनर्निर्माणका कारण ट्राफिक प्रहरीलाई बढी कठिनाइ भएको भन्दै चश्मा वितरण गरिएको हो। कार्यक्रमलाई हरेक वर्ष निरन्तरता दिने जनाइएको छ।
प्रमुख प्रहरी उपरीक्षक सिलवालले चस्माले ट्राफिक प्रहरीलाई काम गर्न सजिलो हुने र आँखाको समस्या कम गराउने बताउनुभयो । ईश्वरपुर नगरप्रमुख आचार्यले नागरिकको सुरक्षामा खटिने ट्राफिक प्रहरीलाई स्थानीय तहले सहयोग गर्नुपर्ने बताउनुभयो ।
यसै अवसरमा भरतपुर आँखा अस्पतालले ईश्वरपुर नगरपालिकालाई ३१ प्रकारका करिब ११ लाख रुपैयाँ बराबरका स्वास्थ्य सामग्री पनि प्रदान गरेको छ। कार्यक्रममा संघका पदाधिकारी तथा स्थानीय जनप्रतिनिधिहरूलाई सम्मानसमेत गरिएको थियो।
प्रकाशित मिति: बुधबार, साउन १४, २०८२
