स्याङ्जा । गत आर्थिक वर्ष २०८१÷८२ मा स्याङ्जा जिल्लामा सामाजिक सुरक्षा भत्तामा झण्डै दुई अर्ब रुपैयाँ खर्च भएको छ।
कोष तथा लेखा नियन्त्रण कार्यालय स्याङ्जाका प्रमुख थमनारायण अर्यालका अनुसार, जिल्लाका ११ वटा स्थानीय तहमार्फत १ अर्ब ८८ करोड ११ लाख ७८ हजार ५२२ रुपैयाँ खर्च गरिएको हो। स्याङ्जामा रहेका ५ नगरपालिका र ६ गाउँपालिकामध्ये नगरपालिकातर्फ १ अर्ब १५ करोड २२ लाख ५६ हजार ५५३ र गाउँपालिकातर्फ ७२ करोड ८९ लाख २१ हजार ९६८ रुपैयाँ खर्च भएको छ।
सबैभन्दा धेरै सामाजिक सुरक्षा भत्ता पुतलीबजार नगरपालिकामा खर्च भएको छ, जहाँ २९ करोड १८ लाख ४२ हजार ५६८ रुपैयाँ खर्च गरिएको छ। त्यसपछि वालिङ नगरपालिकामा २८ करोड ७० लाख ४ हजार ५३५, गल्याङमा २३ करोड ६७ लाख ९६ हजार ४४६, भीरकोटमा १७ करोड ४३ लाख १५ हजार ५४१, र चापाकोट नगरपालिकामा १६ करोड २२ लाख ९७ हजार ४६३ रुपैयाँ खर्च भएको छ।
गाउँपालिकातर्फ सबैभन्दा बढी बिरुवा गाउँपालिकामा १४ करोड ५२ लाख ६८ हजार ४०६ खर्च भएको छ। त्यसपछि कालीगण्डकी गाउँपालिकामा १३ करोड ७ लाख ४७ हजार ४५६, आँधीखोला गाउँपालिकामा १२ करोड ७३ लाख ५२ हजार १५०, हरिनास गाउँपालिकामा ११ करोड ८० लाख १४ हजार १२४, अर्जुनचौपारीमा १० करोड ७९ लाख ८० हजार ९०९ खर्च भएको छ। सबैभन्दा कम खर्च फेदीखोला गाउँपालिकामा भएको हो, जहाँ ९ करोड ९५ लाख ५८ हजार ९२३ रुपैयाँ खर्च गरिएको छ।
नेपाल सरकारले ज्येष्ठ नागरिक, दलित ज्येष्ठ नागरिक, एकल महिला, विधवा, अपाङ्गता भएका व्यक्ति, अति अशक्त र लोपोन्मुख जातिलाई लक्षित गरी सामाजिक सुरक्षा भत्ता उपलब्ध गराउँदै आएको छ।
प्रकाशित मिति: सोमबार, साउन १२, २०८२
