काठमाडौँ । सामुदायिक रेडियो प्रसारक संघ (अकोराब), नेपाल आदिवासी जनजाति पत्रकार महासंघ र सञ्चारिका समूह समावेशीकरणको मुद्दामा सहकार्य गर्न सहमत भएका छन् ।
सामुदायिक रेडियो प्रसारक संघ (अकोराव) नेपालले नेपाल आदिवासी जनजाति पत्रकार महासंघ (फोनिज) र सञ्चारिका समूहको नवनिर्वाचित कार्यसमितिका पदाधिकारीलाई वधाई तथा शुभकामना प्रदान गर्न आयोजना गरेको कार्यक्रममा तीन संस्थाका पादाधिकारीहरूले साझा मुद्दामा सहकार्य र समन्वय गर्ने प्रतिवद्धता जनाएका हुन् ।
समावेशीकरणको विषयलाई अघि बढाउने प्रतिवद्धता जनाउँदै संस्थाका अध्यक्षहरुले पत्रकारका हकहित, समानुपातिक समावेशीकरण र भाषिक विषयमा सहकार्य गरेर अघि बढ्ने प्रतिवद्धता जनाए ।
अकोराबद्वारा सञ्चालित सीआईएनको १७ औं स्थापना दिवसको सन्दर्भमा सीआईएनले समेट्नु पर्ने विषयमा बक्ताहरुले आफ्नो विचार राख्दै विभिन्न सुझाव पनि दिएका छन् ।
आदिवासी जनजाति पत्रकार महासंघ (फोनिज) का अध्यक्ष लक्की चौधरीले नेपालका सामुदायिक रेडियोले भाषा र संस्कृतिको प्रचार–प्रसार, संरक्षणमा राम्रो योगदान पुगाएको भन्दै समानुपातिक समावेशीकरण र आदिबासी पत्रकारको हकहित तथा समग्र पत्रकारिताको हकहितमा हातेमालो गरेर अघि बढ्ने प्रतिवद्धता जनाउनुभयो ।
उहाँले भाषा र समावेशीकरणको मुद्दामा आफूहरू अकोराबसँग सहकार्य गर्न तयार रहेको धारणा राख्नुभयो ।
सञ्चारिका समूहका अध्यक्ष कमला पन्थीले पत्रकारितामा महिला पत्रकारको प्रवेश गराउन सामुदायिक रेडियोले महत्वपूर्ण भूमिका खेलेको तर टिकाउने चुनौती रहेको बताउनुभयो ।
महिलाको सवालमा अकोराबसँग सँगसँगै अघि बढ्दा अभियान सफल हुने पन्थीको भनाइ छ ।
अकोराबका अध्यक्ष अर्जुन गिरीले महिलाको सवाल र आदिवासी जनजातिको सवाल नै सामुदायिक रेडियोको प्राथमिक विषय भएको जानकारी गराउनुभयो ।
अकोरा, फोनिज र सञ्चारिका समूहसँग सहकार्य गरेर अघि बढिरहेको र आगामी दिनमा थप योजनाबद्ध रुपले अघि बढ्ने प्रतिवद्धता अध्यक्ष गिरिले जनाउनुभयो ।
सो अवसरमा संघका अध्यक्ष गिरीले नवनिर्वाचित फोनिजका अध्यक्षसहित पदाधिकारी र सदस्यहरु, सञ्चारिकाका अध्यक्षसहित पदाधिकारी र सदस्यहरुलाई अकोरावको कार्यालयमा स्वागत गर्दै बधाई ज्ञापन गर्नुभयो ।
कार्यकालको सफलताको शुभकामना व्यक्त गर्दै साझा मुद्दामा सदैव सहकार्य गरी अघि बढ्न आफू प्रतिवद्ध रहेको उहाँको भनाइ थियो ।
कार्यक्रममा सहभागीहरूले महिला तथा किशोरीको स्वास्थय र सचेतनाका बारेमा थप कार्यक्रम गर्नुपर्ने धारणा राखेका थिए ।
प्रकाशित मिति: आइतबार, जेठ १२, २०८२
