काठमाडौँ । काभ्रेको पनौतीमा कुलोले बगाउँदा एक जना महिला बेपत्ता भएको प्रहरीले जनाएको छ ।
पनौती नगरपालिका ५ सुब्बा गाउँकी २८ वर्षीया रेनुका गिरी मेलाबाट फर्कने क्रममा एक्कासी बढेको कुलो तर्दा बेपत्ता हुनुभएको प्रहरीको भनाइ उधृत गर्दै प्राइम एफएम काभ्रेले जनाएको छ ।
बेपत्ता गिरीको आज बिहानैबाट पनि खोजी सुरु गरिने प्रहरीको भनाइ छ ।
काभ्रेकै रोशी गाउँपालिका १२ माम्ती स्थित बि.पि.राजमार्गमा पर्ने रोशी खोलाको डाईभर्सन बाढीले बगाएपछि अबरुद्ध भएको बीपी राजमार्ग अझैँ सञ्चालनमा आउन सकेको छैन ।
अर्को सूचना नआएसम्म बीपी राजमार्ग हुदै जाने सवारी साधनलाई उक्त बाटो प्रयोग नगर्न जिल्ला प्रहरी कार्यालय काभ्रेका सूचना अधिकारी प्रहरी नायब उपरीक्षाक मीनबहादुर घलेले अनुरोध गर्नुभयो ।
पूर्वपश्चिम राजमार्गअन्तर्गत नवलपुरको चोरमारामा रहेको गिरुवारी खोलाको पुल भाँचिएपछि पूर्वपश्चिम राजमार्ग पूर्ण रुपमा अवरुद्ध भएको छ ।
जिल्ला प्रहरी कार्यालय नवलपुरका प्रमुख, प्रहरी उपरीक्षक यादव ढकालका अनुसार पुल केही भासिएकाले मर्मत नगरी यो पुलबाट गाडी चलाउन सक्ने अवस्था छैन ।
सडक विभागलाई आफूहरुले खबर गरेकाले त्यहाँबाट प्राविधिक नआउँदासम्म सडक सञ्चालन गर्न सकिने अवस्था नभएको उहाँको भनाइ छ ।
पुलमा किलिङ्गर कच्चा पदार्थ बोकी बिरगञ्जतर्फ जाँदैगरेको एउटा टेलर पुलमा गुड्दै गर्दा भासिएपछि यातायात अवरुद्ध भएको दर्पण एफएमले खबर पठाएको छ ।
डाईभर्सनमार्फत यातायातलाई एकतर्फी बनाउने प्रयास भइरहेको जिल्ला ट्राफिक प्रहरी कार्यालयका पमुख, प्रहरी निरीक्षक जनक बन्जराले बताउनुभयो ।
प्रहरीले यात्रु र चालकलाई सजग रहन आग्रह गरेको छ। पुल पूर्ण रूपमा बन्द भएपछि अन्य कुनै वैकल्पिक मार्ग प्रयोग गर्न प्रहरीले अनुरोध गरेको छ ।
प्रकाशित मिति: मंगलबार, वैशाख ३०, २०८२
