सल्यान । सल्यानको वनगाड कुपिण्डे नगरपालिका–४ डोब्केमा रहेको सल्लेरी सामुदायिक वनले उपभोक्तालाई आयआर्जनका लागि मौरीघार वितरण गरेको छ ।
समूहमा आबद्ध ६५ जना किसानलाई मौरीघार वितरण गरिएको हो ।
सामुदायिक वनको १ लाख ४ हजार र पारिस्थितिकीय प्रणाली परियोजना (ईबिए) को ६ लाख ७५ हजार रकमबाट आधुनिक मौरीघार लगायतका सामग्री वितरण गरिएको वन उपभोक्ता समितिका अध्यक्ष इन्द्र बुढाथोकीले बताउनुभयो ।
उहाँले डोब्केका चारैतिर जङ्गल र चरनक्षेत्र भएकाले मौरीपालनलाई व्यावसायिक रुपमा अघि बढाउन सकून् भनेर घार वितरण गरिएको उहाँले बताउनुभयो ।
परम्परागत घारमा मौरीपालन गर्दै आएका बलबहादुर बुढाथोकीले सामुदायिक वनले आधुनिक घार उपलब्ध गराएर केही राहत हुने बताउनुभयो ।
वडा नं ४ का अध्यक्ष पुष्कर बुढाले सामुदायिक वनले उपभोक्तालाई घार वितरण गरेर आयआर्जनतर्फ प्रोत्साहन गरेको बताउनुभयो ।
वन समूहले किसानहरूलाई आधुनिक प्रविधिमा आधारित मौरीपालनमा प्रेरित गर्दै उनीहरूको आर्थिक सुधारका लागि यो कार्यक्रम सञ्चालन गरेको जनाएको छ।
प्रकाशित मिति: सोमबार, फागुन २६, २०८१
