काठमाडौँ । जाजरकोट भूकम्प प्रभावित क्षेत्रहरूमा जीविकोपार्जन सुधार र प्रकोप प्रतिरोधात्मक क्षमता अभिवृद्धि परियोजना कार्यान्वयनका लागि संयुक्त राष्ट्रसङ्घीय विकास कार्यक्रम (यूएनडीपी) नेपाललाई जापान सरकारले अनुदान सहायता प्रदान गरेको छ ।
सहयोगका लागि नेपालका लागि जापानी राजदूतावास र संयुक्त राष्ट्रसङ्घीय विकास कार्यक्रम (यूएनडीपी) नेपालबीच एक सम्झौतामा हस्ताक्षर गरिएको छ ।
यूएनडिपीको कार्यालय पुल्चोकमा एक कार्यक्रमका बीच उक्त सम्झौतामा नेपालका लागि जापानका राजदूत माएदा तोरू र यूएनडीपी नेपालका आवासीय प्रतिनिधि क्योको योकोसुकाले हस्ताक्षर गर्नुभएको थियो ।
यस साझेदारीले जाजरकोट भूकम्पपछिको नेपाल सरकारको पुनर्निर्माण प्रयासहरूमा सहयोग गर्ने जापानको प्रतिबद्धतालाई उजागर गरेको बताउदै यो सहयोगबाट जनताको जीवनलाई सहज बनाउने विश्वास व्यक्त गर्नुभयो ।
युएनडीपी नेपालका आवासीय प्रतिनिधि क्योको योकोसुकाले परियोजनाले सरकारका सबै तहहरूसँग सहकार्य गर्दै पुनर्निर्माण र प्रतिरोधात्मक क्षमता अभिवृद्धि गर्न सहयोग गर्ने बताउनुभयो ।
प्रारम्भिक पुनर्स्थापना र प्रकोप पूर्व तयारीसम्बन्धी पूर्वाधारमा आधारित रहँदै यो परियोजनाले भूकम्प प्रभावित समुदायहरूको जीविकोपार्जनमा सहयोग गर्नेछ।
परियोजनाले भूकम्पका कारण अवरुद्ध सार्वजनिक सेवा तथा जीविकोपार्जन प्रवाहलाई सुधार गर्ने तथा सरकारको आगामी दीर्घकालीन पुनर्निर्माण, पुनर्थापना , र पुनर्संरचना कार्यक्रमको कार्यान्वयनलाई समर्थन गर्ने उहाँले बताउनुभयो ।
यसका लागि जापान सरकारद्वारा २ सय ३१ मिलियन नेपाली रुपैयाँ बराबरको बजेट विनियोजन गरिएको छ ।
प्रकाशित मिति: बुधबार, फागुन १४, २०८१
